ആലപ്പുഴ: ഹയര്‍സെക്കണ്ടറി പരീക്ഷയില്‍ ജില്ലയില്‍ നാല് സ്‌കൂളുകള്‍ക്ക് നൂറ് മേനി വിജയം.ഇതില്‍ മൂന്നും സര്‍ക്കാര്‍ സ്‌കൂളുകളാണെന്നതാണ് ഏറെ ശ്രദ്ധേയം.ഒരു അണ്‍ എയ്ഡഡ് സ്‌കൂളും നൂറു ശതമാനം വിജയം കരസ്ഥമാക്കി.
മുന്‍ വര്‍ഷം ഇത് രണ്ട് സ്‌കൂളുകള്‍ക്കായിരുന്നു.നൂറ് മേനിയില്‍ ഇരട്ടി നേട്ടമാണ് ഇക്കുറി.സര്‍ക്കാര്‍ സ്‌കൂളുകളായ പുന്നപ്ര മോഡല്‍ റസിഡന്‍ഷ്യല്‍ ഹയര്‍സെക്കണ്ടറി(35), അമ്പലപ്പുഴ കെ കെ കുഞ്ചുപിള്ള സ്മാരക ഹയര്‍സെക്കണ്ടറി(113), കലവൂര്‍ ഗവ. ഹയര്‍സെക്കണ്ടറി(120) എന്നിവക്കും മുഹമ്മ മദര്‍തെരേസ ഹയര്‍സെക്കണ്ടറി സ്‌കൂളു(42)മാണ് നൂറ് ശതമാനം വിജയം കൊയ്തത്.അതേ സമയം, അണ്‍ എയ്ഡഡ് മേഖലയിലെ ഒരു സ്‌കൂളിന് 30 ശതമാനത്തില്‍ താഴെ മാത്രമാണ് വിജയം.കായംകുളം വിഠോഭാ എച്ച് എസ് എസ്(8017)ലെ വിജയശതമാനം 21.25 ആണ്. ഹയര്‍സെക്കന്‍ഡറി പരീക്ഷയില്‍ ജില്ലയില്‍ 11 കുട്ടികള്‍ 1200 ല്‍ 1200 മാര്‍ക്കും നേടി മിടുക്ക് തെളിയിച്ചു.
ഗൗരികൃഷ്ണ എ(ഗവ. എം.എച്ച്.എസ്.എസ് അമ്പലപ്പുഴ), കൃഷ്ണനുണ്ണി ആര്‍ എസ്, ദേവിക ബി കുമാര്‍, കീര്‍ത്തന അനില്‍(ഗവ. ബോയ്‌സ് എച്ച്.എസ്.എസ് കായംകുളം), അമല്‍ കൃഷ്ണന്‍(കെ.കെ.എം ഗവ. എച്ച് എസ് എസ് ഇലിപ്പക്കുളം), വി.ശ്രീലക്ഷ്മി(ടി.ഡി.എച്ച്.എസ് എസ് തുറവൂര്‍), റോഷ്‌നി ആര്‍ ഷേണായി(ടി ഡി എച്ച് എസ് എസ് ആലപ്പുഴ), ആന്‍മരിയ കെ.ബിനു, ദേവീകൃഷ്ണ മേനോന്‍ എസ്(ഹോളിഫാമിലി ബോയ്‌സ് ഹയര്‍സെക്കന്‍ഡറി ചേര്‍ത്തല), ആര്യ ദേവി എ എസ്, ഹരിപ്രിയ കെ.എച്ച്(കെ.കെ കുഞ്ചുപിള്ള മോമ്മോറിയല്‍ എച്ച് എസ് എസ് അമ്പലപ്പുഴ) എന്നിവരാണ് മുഴുവന്‍ വിഷയങ്ങള്‍ക്കും സമ്പൂര്‍ണ മാര്‍ക്ക് നേടി മിടുക്ക് തെളിയിച്ചത്.