റിയാദ്: സഊദിയില്‍ ദന്തചികിത്സാ മേഖലയിലും സമ്പൂര്‍ണ സ്വദേശിവല്‍ക്കരണം നടപ്പാക്കാന്‍ പദ്ധതി തയാറാക്കുന്നു. അടുത്ത ഒന്‍പത് വര്‍ഷത്തിനുള്ളില്‍ പൂര്‍ണമായും സ്വദേശിവല്‍ക്കരിക്കാനാണ് പദ്ധതി.
ഈ കാലയളവില്‍ 21,800 ദന്ത ഡോക്ടര്‍മാരുടെ ജോലിയില്‍ സ്വദേശിവല്‍ക്കരണം നടപ്പാക്കുമെന്ന് സഊദി ആരോഗ്യ സ്‌പെഷലൈസേഷന്‍ അതോറിറ്റി വ്യക്തമാക്കി.
ദന്തഡോക്ടര്‍മാര്‍ രാജ്യത്ത് തൊഴിലില്ലാതെ തുടരുന്നുണ്ടെന്ന കണ്ടെത്തലിനെ തുടര്‍ന്നാണ് ഒന്‍പതുവര്‍ഷത്തെ പദ്ധതി തയാറാക്കി സമ്പൂര്‍ണ സഊദിവല്‍ക്കരണം നടപ്പാക്കുന്നത്. ഓരോവര്‍ഷവും നൂറുകണക്കിന് ദന്തഡോക്ടര്‍മാരാണ് സഊദിയില്‍ ബിരുദം നേടി പുറത്തിറങ്ങുന്നത്.
ഈ വര്‍ഷം പുതുതായി 1,956 പുതിയ ബിരുദധാരികളാണ് ദന്തരോഗ രംഗത്ത് പുറത്തിറങ്ങുന്നത്. 2020ല്‍ 2,336 പേര്‍ പഠനം കഴിഞ്ഞ് പുറത്തിറങ്ങുമെന്നാണ് അതോറിറ്റി പ്രതീക്ഷിക്കുന്നത്. ഇത്തരത്തില്‍ ഓരോ വര്‍ഷവും തൊഴില്‍ രംഗത്തേക്കിറങ്ങുന്ന ഡോക്ടര്‍മാരുടെ കണക്കനുസരിച്ചാണ് സമ്പൂര്‍ണ സ്വദേശിവല്‍ക്കരണം നടപ്പാക്കാന്‍ ഒരുങ്ങുന്നത്.