പാണ്ടിക്കാട്: മണല്‍ക്കടത്തുള്‍പ്പെടെയുള്ള കേസുകളില്‍ പൊലീസ് പിടികൂടിയ തൊണ്ടി വാഹനങ്ങള്‍ സൂക്ഷിക്കുന്ന പെരിന്തല്‍മണ്ണ റോഡിലെ പഴയ എസ്.ഐ . ക്വാര്‍ട്ടേഴ്‌സ് പരിസരം തെരുവ്‌നായ്ക്കളുടെ താവളമായി. കട്ടക്കുളം, ചൂരക്കാവ്, പി.എച്ച്.സി പരിസരം, മൊയതുണ്ണിപ്പാടം എന്നിവിടങ്ങളില്‍ തെരുവു നായക്കൂട്ടം കൂട്ടംകെട്ടി അലയുന്നതിനാല്‍ കുട്ടികളും മുതിര്‍ന്നവരും രോഗികളും കടുത്ത ആശങ്കയിലാണ്. മല്‍സ്യ,ഇറച്ചി കടകളില്‍ നിന്നുള്ള അവശിഷ്ടങ്ങള്‍ തിന്നു തൊണ്ടി വാഹനങ്ങളില്‍ തമ്പടിക്കുന്ന ഇവ കൂട്ടമായി റോഡിലിറങ്ങുന്നത് വാഹനങ്ങളില്‍ സഞ്ചരിക്കുന്നവര്‍ക്കു ഭീഷണിയായിരിക്കുകയാണ്. ഇരു ചക്ര വാഹനങ്ങളില്‍ യാത്രചെയ്യുന്നവരാണു നായകള്‍ റോഡിന്നു കുറുകെ പാഞ്ഞു പലപ്പോഴും അപകടത്തില്‍ പെടുന്നത്.