ജിദ്ദ: നാല്‍പ്പത് ദിവസം നീണ്ട് നില്‍ക്കുന്ന ജിദ്ദ സീസണ്‍ ഫെസ്റ്റിവലില്‍ പങ്കെടുക്കുന്നതിനായി മൂന്ന് മിനിറ്റിനുള്ളില്‍ ഇ ടൂറിസ്റ്റ് വിസ നല്‍കുമെന്ന് അധികൃതര്‍ വ്യക്തമാക്കി. സീസണ്‍ ഫെസ്റ്റിവലിലെ ഏതെങ്കിലും പരിപാടിക്ക് ടിക്കറ്റ് എടുത്തവര്‍ക്കാണ് ഇന്‍സ്റ്റന്റ് ഇടൂറിസ്റ്റ് വിസ നല്‍കുകയെന്ന് ജിദ്ദ സീസണ്‍ ഫെസ്റ്റിവല്‍ ജനറല്‍ സൂപ്പര്‍വൈസര്‍ റെയിദ് അബു സൈനദ വ്യക്തമാക്കി.

ജൂണ്‍ എട്ട് മുതല്‍ ആരംഭിക്കുന്ന ജിദ്ദ സീസണ്‍ ഫെസ്റ്റിവല്‍ ജൂലായ് പതിനെട്ടിനാണ് സമാപിക്കുക. എല്ലാ പ്രായത്തിലുമുള്ളവര്‍ക്കും കുടുംബത്തോടൊപ്പം പങ്കെടുക്കാവുന്ന തരത്തിലുള്ള എന്റര്‍ടൈന്‍മെന്റ് പരിപാടികളാണ് ഉണ്ടാവുക. ടൂറിസം മറ്റൊരു പ്രധാന വരുമാന മാര്‍ഗമായി മാറ്റാനുള്ള ദീര്‍ഘകാല പദ്ധതിയുടെ ഭാഗമാണ് ജിദ്ദ സീസണ്‍ ഫെസ്റ്റിവല്‍.

ഇന്‍സ്റ്റന്റ് ഇടൂറിസ്റ്റ് വിസ ലഭിക്കുന്നതിനായി ഫെസ്റ്റിവലിലെ ഏതെങ്കിലും ഒരു പ്രോഗ്രാമിന്റെ ടിക്കറ്റ് ആവശ്യമാണ്. ടിക്കറ്റ് കൈവശപ്പെടുത്തുമ്പോള്‍ തന്നെ മൂന്ന് മിനിറ്റിനകം വിസ ലഭിക്കും. www.sharek.com.sa എന്ന പോര്‍ട്ടലില്‍ പ്രവേശിച്ച് അതിലെ നിര്‍ദ്ദേശങ്ങള്‍ അനുസരിച്ച് നടപടിക്രമങ്ങള്‍ പൂര്‍ത്തിയാക്കിയാല്‍ വിസ ലഭിക്കുമെന്ന് അബു സൈനദ വ്യക്തമാക്കി. സീസന്‍ ഫെസ്റ്റിവലോടെ ജിദ്ദ ലോകത്തിന്റെ ടൂറിസം മാപ്പില്‍ സ്ഥാനം പിടിക്കുമെന്ന് സംഘാടര്‍ പറയുന്നു. വരും വര്‍ഷങ്ങളിലും കൂടുതല്‍ മെച്ചപ്പെടുത്തി കൊണ്ടായിരിക്കും സംഘാടനം നിര്‍വഹിക്കുക.