കൊച്ചി: സംഗീതജ്ഞന്‍ ബാലഭാസ്‌കറിന്റെ മരണത്തിന് സ്വര്‍ണക്കടത്തുമായി ബന്ധമില്ലെന്നും നടന്നത് അപകടമരണം തന്നെയാണെന്നും ബാലഭാസ്‌കറിന്റെ സുഹൃത്തും മുന്‍ പ്രോഗ്രാം കോ ഓഡിനേറ്ററുമായ പ്രകാശ് തമ്പി. ഇതിന്റെ പേരില്‍ ഇപ്പോള്‍ ഉയരുന്ന വിവാദങ്ങള്‍ അനാവശ്യമാണെന്നും അപകട സമയം കാര്‍ ഓടിച്ചിരുന്നത് അര്‍ജുന്‍ ആയിരുന്നെന്നും തമ്പി പറഞ്ഞു.
എറണാകുളം സാമ്പത്തിക കുറ്റവിചാരണ കോടതിയില്‍ ഹാജരാക്കാന്‍ കൊണ്ടുവന്നപ്പോള്‍ കോടതിവളപ്പില്‍ മാധ്യമങ്ങളോടു പ്രതികരിക്കുകയായിരുന്നു പ്രകാശ് തമ്പി. അപകടം ഉണ്ടായപ്പോള്‍ ഒരു സഹോദരനെ പോലെ കൂടെ നിന്നു. അതാണോ താന്‍ ചെയ്ത തെറ്റെന്നും തമ്പി ചോദിച്ചു.

അപകടത്തില്‍ ദുരൂഹതയില്ല. സത്യാവസ്ഥ പലതും പുറത്തുവന്നിട്ടുണ്ട്. എന്നാല്‍ അതൊന്നും ആരും പറയുന്നില്ലെന്നും തമ്പി കുറ്റപ്പെടുത്തി. സാമ്പത്തിക കുറ്റവിചാരണ കോടതിയില്‍ പ്രതിയുടെ റിമാന്‍ഡ് പരിഗണിക്കുന്നതിനൊപ്പമാണ് ഇയാളുടെ ഹരജിയും കോടതി പരിഗണിച്ചത്. കസ്റ്റംസ് ആക്ട് 108 പ്രകാരം തന്നില്‍ നിന്ന് എഴുതി വാങ്ങിയ മൊഴി പരിഗണിക്കരുതെന്ന് കാണിച്ചാണ് പ്രതി ഹരജി സമര്‍പ്പിച്ചത്. അതിനിടെ പ്രകാശ് തമ്പി ഡി.ആര്‍.ഐക്കെതിരേ മൊഴി നല്‍കി. അറസ്റ്റിലായപ്പോള്‍ ഡി.ആര്‍.ഐ ഉദ്യോഗസ്ഥര്‍ മര്‍ദിച്ചാണ് തന്നില്‍ നിന്ന് മൊഴി എഴുതി വാങ്ങിയത്. അതേസമയം, പ്രകാശ് തമ്പിയുടെ റിമാന്‍ഡ് കോടതി ഈ മാസം 26 വരെ നീട്ടി. തിരുവനന്തപുരം വിമാനത്താവളത്തില്‍ ഡയരക്ടറേറ്റ് ഓഫ് റവന്യൂ ഇന്റലിജന്‍സ് 25 കിലോ സ്വര്‍ണം പിടികൂടിയ കേസില്‍ റിമാന്‍ഡിലുള്ള പ്രകാശന്‍ തമ്പിയെ കാക്കനാട് ജില്ലാ ജയിലില്‍ നിന്നാണ് ഇന്നലെ കോടതിയിലെത്തിച്ചത്.