തലശ്ശേരി: തലശ്ശേരിക്ക് വഴികാട്ടിയായ സ്വാതന്ത്ര്യ സമര സേനാനിയെ അനുസ്മരിച്ച് ഒരു ദിവസം. തലശേരി നഗരസഭയുടെ ആദ്യകാല ചെയര്‍മാനുമായിരുന്ന പി.കുഞ്ഞിരാമന്‍ വക്കീലിനെയാണ് ജവഹര്‍ കള്‍ച്ചറല്‍ ഫോറത്തിന്റെ നേതൃത്വത്തില്‍ അനുസ്മരിച്ചത്.
പഴയ കാല നേതാക്കളുടെയും പുതുതലമുറയിലെ വിദ്യാര്‍ഥികളുടെയും സാന്നിധ്യത്തിലായിരുന്നു കനക് റസിഡന്‍സി ഹാളില്‍ വച്ച് അനുസ്മരണ സമ്മേളനം നടത്തിയത്.
1945ല്‍ ഗാന്ധിജിയുടെ അറസ്റ്റിനെ തുടര്‍ന്ന് ചെയര്‍മാന്‍ സ്ഥാനം രാജിവച്ച നേതാവു കൂടിയായിരുന്നു കുഞ്ഞിരാമന്‍ വക്കീല്‍. 1946ല്‍ ഇന്ത്യന്‍ ഭരണഘടനാ അസംബ്ലിയില്‍ മെമ്പറായും 1952ല്‍ പാര്‍ലമെന്റ് മെമ്പറായും പ്രവര്‍ത്തിച്ചിട്ടുണ്ട്.
 1952 മുതല്‍ 55 വരെയും തലശ്ശേരി നഗരസഭാ ചെയര്‍മാനായി വീണ്ടും പ്രവര്‍ത്തിച്ചിരുന്നു.1960 ല്‍ ജസ്റ്റിസ് വി.ആര്‍.കൃഷണയ്യരെ തോല്പിച്ചാണ് തലശ്ശേരിയില്‍ നിന്നും നിയമസഭയിലെത്തിയത്. കനക് റസിഡന്‍സി ഹാളില്‍ നടന്ന അനുസ്മരണ സമ്മേളനം തലശ്ശേരി സബ് ജഡ്ജ് എം.പി.ജയരാജ് ഉദ്ഘാടനം ചെയ്തു.
വിവിധ മേഖലകളില്‍ പ്രാഗത്ഭ്യം തെളിയിച്ചവരെ ചടങ്ങില്‍ ആദരിച്ചു. നസീര്‍ കരിയാമ്പത്ത്, കെ.പി.ഷീജിത്ത്, സന്ധ്യാ സുകുമാരന്‍, ടി.ടി.മൊയ്തു എന്നിവരെ സബ് ജഡ്ജ് ഉപഹാരം നല്‍കി ആദരിച്ചു.എസ്.എസ്.എല്‍.സി.പരീക്ഷയില്‍ ഉന്നത വിജയം നേടിയ വിദ്യാര്‍ഥികളെ മുന്‍ മന്ത്രി കെ.പി.മോഹനന്‍ ഉപഹാരം നല്‍കി.
 ജവഹര്‍ കള്‍ച്ചറല്‍ ഫോറം ചെയര്‍മാന്‍ കെ.ശിവദാസന്‍ അധ്യക്ഷനായി. ജന. കണ്‍വീനര്‍ ഉസ്മാന്‍ പി. വടക്കുമ്പാട് സ്വാഗതം പറഞ്ഞു. കണ്‍വീനര്‍ രാമകൃഷ്ണന്‍ വടക്കുമ്പാട് ,കുഞ്ഞിരാമന്‍ വക്കീലിന്റെ മകള്‍ ഒ.എം.വി ജയറാണി, ടി.കെ. ഡി. മുഴപ്പിലങ്ങാട്, ഡോ.കെ.പി.തോമസ്, കെ.ഇ പവിത്രരാജ് സംസാരിച്ചു.