കോഴിക്കോട്: സര്‍ക്കാര്‍ ആശുപത്രികളില്‍ ദന്തല്‍ മെക്കാനിക് തസ്തിക സൃഷ്ടിക്കണമെന്ന് കേരള ദന്തല്‍ മെക്കാനിക് വെല്‍ഫെയര്‍ അസോസിയേഷന്‍ (കെ.ഡി.എം.ഡബ്ല്യു.എ) സര്‍ക്കാരിനോട് ആവശ്യപ്പെട്ടു. ദന്ത ചികിത്സയുമായി ബന്ധപ്പെട്ട കൃത്രിമ വസ്തുക്കള്‍ നിര്‍മിക്കുന്ന സാങ്കേതിക വിദഗ്ധരായ മെക്കാനിക്കുകള്‍ ഈ മേഖലയില്‍ ഏറ്റവും അധികം തഴയപ്പെടുന്ന വിഭാഗമാണെന്ന് അവര്‍ ആരോപിച്ചു.
കേരളത്തില്‍ 200ഓളം ദന്തല്‍ വിങ്ങുകള്‍ പ്രവര്‍ത്തിക്കുന്നുണ്ടെങ്കിലും വെറും 33 ഇടങ്ങളില്‍ മാത്രമേ ദന്തല്‍ മെക്കാനിക്കുകളുള്ളൂ. നിലവിലുള്ള ദന്തല്‍ വിങ്ങുകളില്‍ ദന്തല്‍ മെക്കാനിക്കുകളുടെ തസ്തിക സൃഷ്ടിച്ച് സാധാരണ ജനങ്ങള്‍ക്ക് ഉപകാരപ്രദമായ ചികിത്സകള്‍ കുറഞ്ഞ ചെലവില്‍ ലഭിക്കാന്‍ വേണ്ട നടപടികള്‍ കൈക്കൊള്ളണമെന്നും കെ.ഡി.എം.ഡബ്ല്യു.എ ആവശ്യപ്പെട്ടു. എം. ഭാരവാഹികളായ മനോജ് കുമാര്‍, സി. യാഷിന്‍, എം. ഭാഗ്യരാജ്, കെ.പി. സയ്യിദ് നിയാസ്, കെ.ടി മുഹമ്മദ് സലാം വാര്‍ത്താസമ്മേളനത്തില്‍ പങ്കെടുത്തു.