വാടാനപ്പള്ളി: ദേശിയപാത പതിനേഴില്‍ നാട്ടിക കോട്ടണ്‍മില്ലിന് സമീപം നിയന്ത്രണം വിട്ട ലോറി ബസിലും മോട്ടോര്‍ ബൈക്കിലും കാറിലും ഇടിച്ച് മൂന്ന് പേര്‍ക്ക് പരിക്കേറ്റു. ബൈക്ക് യാത്രികനായ പഴുവില്‍ സ്വദേശി ഇഞ്ചുമുടി വീട്ടില്‍ റജിന്‍ (25), ബസ് ജീവനക്കാരായ കാഞ്ഞാണി കരുവാന്‍ വളവില്‍ വടക്കൂട്ട് വീട്ടില്‍ അരുണ്‍കുമാര്‍ (28), മനക്കൊടി സ്വദേശി ക്ലിയത്ത് വീട്ടില്‍ ഹരിദാസ് (24) എന്നിവര്‍ക്കാണ് പരിക്കേറ്റത്. ഇതില്‍ റജിന്റെ പരിക്ക് സാരമുള്ളതാണ്. തൃപ്രയാര്‍ ഭാഗത്ത് നിന്നും കാലിത്തീറ്റ കയറ്റി വന്ന ലോറിയാണ് നിയന്ത്രണം വിട്ട് ആദ്യം ബസിലും പിന്നീട് ബൈക്കിലും ഇടിച്ചത്. പിന്നീട് ദേശിയപാതയില്‍ പാര്‍ക്ക് ചെയ്തിരുന്ന കാറിലും ഇടിച്ചാണ് ലോറി നിന്നത്. ലുലു ഗ്രൂപ്പിന്റെ മതില്‍ ഇടിച്ച് തകര്‍ത്ത ബസ് കോബൗണ്ടിനുള്ളിലേക്ക് കയറി പോകുകയായിരുന്നു. ഇടിയുടെ ആഘാതത്തില്‍ കാര്‍ പൂര്‍ണ്ണമായും തകര്‍ന്നു. തൃശൂര്‍ ഏങ്ങണ്ടിയൂര്‍ റൂട്ടിലോടുന്ന കെ.എല്‍ 7 ബി.ജി 5631 എന്ന ബസ് ഡീസല്‍ അടിക്കാന്‍ വേണ്ടി നാട്ടികയിലേക്ക് പോകുകയായിരുന്നു. ബസ് ജീവനക്കാരനായ ബൈക്ക് യാത്രികന്‍ ജോലി കഴിഞ്ഞ് പോകുന്നതിനിടയിലാണ് അപകടത്തില്‍ പെട്ടത്.