തൃശൂര്‍: സമൂഹത്തിന്റെ വിവിധ തലങ്ങളില്‍ വര്‍ധിച്ചുവരുന്ന സ്‌നേഹനിരാസത്തെ നിര്‍മാര്‍ജനം ചെയ്താല്‍ മാത്രമേ നൈതികത വീണ്ടെടുക്കാനും കെട്ടിപ്പടുക്കാനും കഴിയുള്ളുവെന്ന് അബ്ദുസ്സമദ് സമദാനി. സഹൃദയവേദി സാഹിത്യ അക്കാദമിയില്‍ സംഘടിപ്പിച്ച ഡോ. കെ.കെ രാഹുലന്‍ അനുസ്മരണവും മന്ത്രി വി.എസ് സുനില്‍കുമാറിന് അവാര്‍ഡ് ദാനവും നിര്‍വഹിച്ചു സംസാരിക്കുകയായിരുന്നു അദ്ദേഹം. വ്യക്തിയുടെ അകത്തും കുടുംബത്തിന്റെ അംഗങ്ങളിലും കടുത്ത സ്‌നേഹ ശൂന്യതയാണ് വളര്‍ന്നു വരുന്നത്.
വൃദ്ധമാതാപിതാക്കളും പിഞ്ചുകുഞ്ഞുങ്ങളും അതിക്രൂരമായി ഇരയാക്കപ്പെടുകയാണ്. ഒരു മാസത്തിനുള്ളില്‍ മൂന്ന് കുഞ്ഞുങ്ങളാണ് കേരളത്തില്‍ സ്വന്തം വീടുകള്‍ക്കകത്ത് കഠിന മര്‍ദനങ്ങള്‍ക്ക് ശേഷം കൊല ചെയ്യപ്പെട്ടത്. ശിശുക്കള്‍ കൊല ചെയ്യപ്പെടുന്ന ഒരു പ്രദേശമോ, നാടോ ദൈവത്തിന്റെ സ്വന്തം നാട് എന്ന വിശേഷണത്തിന് അര്‍ഹമായി തീരുന്നില്ല. തന്റെ പ്രവര്‍ത്തന മണ്ഡലങ്ങളിലെല്ലാം മനുഷ്യസ്‌നേഹത്തിന്റെ വെളിച്ചം പരത്തിയ മഹിത വ്യക്തിത്വമായിരുന്നു കെ.കെ രാഹുലന്‍. അദ്ദേഹത്തിന്റെ പേരിലുള്ള പുരസ്‌കാരം മന്ത്രി സുനില്‍കുമാറിന് നല്‍കുമ്പോള്‍ അതു പരസ്പര പൂരകമായി തീരുകയാണ്. കൃഷിക്കാരിലേക്ക് ഇറങ്ങിച്ചെല്ലുന്ന കൃഷിമന്ത്രി മാത്രമല്ല പാവങ്ങളോടും അവശരോടും പ്രതിബദ്ധത പുലര്‍ത്തുന്ന പൊതുപ്രവര്‍ത്തകന്‍ കൂടിയാണ് സുനില്‍കുമാറെന്നും സമദാനി പറഞ്ഞു. മന്ത്രി വി.എസ് സുനില്‍കുമാര്‍, ടി.വി ചന്ദ്രമോഹന്‍ സംസാരിച്ചു.