ബ്രസീലിയ: കോപ്പ അമേരിക്കയില്‍ അതിഥികളായെത്തിയ ഖത്തര്‍ അരങ്ങേറ്റം മോശമാക്കിയില്ല. കരുത്തരായ പാരഗ്വയെ ഏഷ്യന്‍ ശക്തിയായ ഖത്തര്‍ സമനിലയില്‍ തളച്ചു. ഇരു ടീമുകളും രണ്ടു വീതം ഗോളുകള്‍ നേടി സമനിലയില്‍ പിരിയുകയായിരുന്നു. രണ്ടുഗോളിന് പിന്നിട്ട് നിന്ന ശേഷമായിരുന്നു ഖത്തറിന്റെ തിരിച്ചുവരവ്. നാലാം മിനിറ്റില്‍ ഓസ്‌കര്‍ കര്‍ഡോസോയിലൂടെ കളിയില്‍ മുന്‍തൂക്കം തേടിയ പാരഗ്വായ്, 56ാം മിനിറ്റില്‍ ഡെര്‍ലിസ് ഗോണ്‍സാലസിലൂടെ രണ്ടാം ഗോളും നേടി ആധിപത്യമുറപ്പിച്ചു.

68ാം മിനിറ്റില്‍ അല്‍മോസ് അലി കോപ്പ അമേരിക്കയില്‍ ഖത്തറിന്റെ ആദ്യ ഗോള്‍ നേടി. ബൗലേം ഖൗക്കിയുടെ മുന്നേറ്റത്തെ തടയാന്‍ പാരഗ്വയുടെ റോഡിഗ്രോ റോജസ് ശ്രമിച്ചെങ്കിലും സ്വന്തം പോസ്റ്റിലേക്കു ഗോളായി മാറിയതോടെ ഏഷ്യാകപ്പ് നേടിയ തങ്ങളുടെ ശക്തി ഒരിക്കലൂടെ ഖത്തര്‍ തെളിയിച്ചു.