അബുദാബി: തലസ്ഥാന നഗരിയിലെ  സ്കൂളുകളിൽ നിന്നും ഉന്നത വിജയം നേടിയ   കുട്ടികളെ അബുദാബി ഇന്ത്യൻ ഇസ്ലാമിക് സെന്റർ സ്കോളസ്റ്റിക് അവാർഡ് നൽകി ഇത്തവണയും ആദരിക്കുന്നു.

ജൂൺ 20ന് വ്യാഴാഴ്ച്ച വൈകിട്ട് 7 മണിക്ക് ഇസ്ലാമിക് സെന്റർ പ്രധാന ഹാളിൽ വെച്ച് പ്രൗഢമായ സദസ്സിൽ വെച്ചാണ് മുന്നൂറോളം കുട്ടികളെ ആദരിക്കുന്നത്.

അബുദാബിയിലെ മുഴുവൻ ഇന്ത്യൻ സ്കൂളുകളിൽ നിന്നും ഇക്കഴിഞ്ഞ സി ബി എസ് സി പത്താം ക്ലാസ്സ് പരീക്ഷയിൽ എല്ലാ വിഷയങ്ങളിലും 91 ശതമാനത്തിലധികം മാർക്ക് വാങ്ങിയ എല്ലാ കുട്ടികളെയും അതോടൊപ്പം എസ് എസ് എൽ സി പരീക്ഷയിൽ മുഴുവൻ വിഷയങ്ങളിലും എ പ്ലസ് വാങ്ങിയ കുട്ടികളെയുമാണ്  ഉപഹാരവും മെഡലും നൽകി ആദരിക്കുന്നത്. ഇതോടൊപ്പം ഇസ്ലാമിക്  സെന്ററിന്റെ  മെമ്പർമാരുടെ നാട്ടിലും ഗൾഫിലുമുള്ള മക്കളിൽ നിന്ന് പത്താം ക്ലാസ്സ്, പ്ലസ്ടു, ഡിഗ്രി പരീക്ഷകളിൽ വിജയിച്ചവരെയും ചടങ്ങിൽ വെച്ച് രക്ഷിതാക്കൾക്ക്  ഉപഹാരവും മെഡലും നൽകി ആദരിക്കും.

തുടർച്ചയായ ഏഴാം തവണയാണ് ശ്രദ്ധേയമായ ഇത്തരം പരിപാടി ഇസ്ലാമിക് സെന്റർ സംഘടിപ്പിച്ച് വരുന്നത്. ഉന്നത വിജയം നേടുന്ന വിദ്യാർത്ഥികളുടെ  കഴിവുകളെ അംഗീകരിക്കുന്നത് തുടർ പഠന രംഗത്ത് കുട്ടികൾക്ക് പ്രോൽസാഹനവും മാതൃകയും നൽകുന്നുണ്ടെന്ന് ഇസ്ലാമിക് സെന്റർ ഭാരവാഹികൾ പറഞ്ഞു.

ചടങ്ങിൽ സാമൂഹ്യ സാംസ്കാരിക, വ്യവസായ, വിദ്യാഭ്യാസ രംഗത്തെ പ്രമുഖരും ഇന്ത്യൻ എംബസി ഉദ്യോഗസ്ഥരും പങ്കെടുക്കും.
പരിപാടിയുടെ ഒരുക്കങ്ങളെല്ലാം പൂർത്തിയായതായി സെന്റർ ഭാരവാഹികൾ അറിയിച്ചു.