തിരുവനന്തപുരം: പ്രളയത്തെത്തുടര്‍ന്ന് വേണ്ടെന്നുവച്ച സ്‌കൂള്‍ മേളകള്‍ മൂന്നു ദിവസമായി ചുരുക്കി നടത്താന്‍ തീരുമാനം. സംസ്ഥാന സ്‌കൂള്‍ കലോത്സവം ഡിസംബര്‍ എഴ്, എട്ട്, ഒന്‍പത് തിയതികളില്‍ ആലപ്പുഴയില്‍ നടക്കും. തിരുവനന്തപുരത്ത് ഒക്ടോബര്‍ 26, 27, 28 തിയതികളിലാണ് കായികമേള. കലോത്സവത്തിലെ രചനാ മത്സരങ്ങള്‍ ജില്ലാതലം വരെ മാത്രം നടത്താനും ഡി.പി.ഐയുടെ അധ്യക്ഷതയില്‍ ചേര്‍ന്ന ഗുണനിലവാര പരിശോധനാ സമിതി യോഗത്തില്‍ തീരുമാനമായി. ചെലവു ചുരുക്കുന്നതിന്റെ ഭാഗമായി വലിയ പന്തലുകള്‍ക്ക് പകരം ഹാളുകളും കലാലയങ്ങളുമാണ് മത്സരങ്ങള്‍ക്ക് വേദികളാവുക. കലോത്സവ വേദികളില്‍ കുടുംബശ്രീയുടെ നേതൃത്വത്തില്‍ പൊതുജന പങ്കാളിത്തത്തോടെ ഭക്ഷണമൊരുക്കും.
സംസ്ഥാന കലോത്സവത്തിന് മുന്നോടിയായുള്ള ജില്ലാ കലോത്സവങ്ങള്‍ രണ്ട് ദിവസം വീതം നവംബര്‍ 12നും 24നും ഇടയില്‍ നടത്തണം. 47 ഇനങ്ങളുള്ള രചനാ മത്സരങ്ങള്‍ ജില്ലാ തലംവരെ മാത്രം നടത്തും. ജില്ലയിലെ രചനകള്‍ സംസ്ഥാന തലത്തില്‍ വിലയിരുത്തി ഗ്രേഡ് നല്‍കും. ഉപ ജില്ലാ കലോത്സവങ്ങള്‍ ഒക്ടോബര്‍ 20നും നവംബര്‍ മൂന്നിനുമിടയില്‍ ഒന്നോ, രണ്ടോ ദിവസം കൊണ്ട് പൂര്‍ത്തിയാക്കണം. സ്‌കൂള്‍ തല മത്സരങ്ങള്‍ ഒക്ടോബര്‍ ഒന്നിനും 13നും ഇടയില്‍ പൂര്‍ത്തിയാക്കണം.
13 ഗെയിംസ് ഇനങ്ങള്‍ സോണല്‍ തലത്തില്‍ അവസാനിപ്പിക്കും. ഇതേ ദിവസങ്ങളില്‍ സ്‌പെഷല്‍ സ്‌കൂള്‍ കലോത്സവം കൊല്ലത്ത് നടക്കും. നവംബര്‍ 24, 25 തിയതികളില്‍ കണ്ണൂരില്‍ വച്ച് സംസ്ഥാന ശാസ്ത്ര-പ്രവൃത്തി പരിചയമേള നടക്കും. ഇതിന്റെ ജില്ലാതല മത്സരങ്ങള്‍ നവംബര്‍ ആദ്യ വാരത്തില്‍ പൂര്‍ത്തിയാക്കണം.
ശാസ്ത്രമേളയിലെ എല്‍.പി, യു.പി വിഭാഗം മത്സരങ്ങള്‍ സ്‌കൂള്‍ തലത്തില്‍ ഒതുക്കും. നിലവില്‍ തയാറാക്കിയിട്ടുള്ള ചോദ്യപേപ്പറുകള്‍ ക്ലാസ് തലത്തില്‍ വിശകലനം ചെയ്യാം. ഒക്ടോബര്‍ 15നകം ക്ലാസ് ടെസ്റ്റുകള്‍ നടത്തണം. ക്രിസ്മസ് പരീക്ഷ സാധാരണപോലെ രണ്ടാം ടേമില്‍ നടത്താനും യോഗത്തില്‍ തീരുമാനമായിട്ടുണ്ട്.