റിയാദ്: സഊദിയിലെ അല്‍ഖര്‍ജ് പര്‍വതനിരകളില്‍ ഒരു ലക്ഷം വര്‍ഷം മുന്‍പ് മനുഷ്യവാസം ഉണ്ടായിരുന്നതായി കണ്ടെത്തല്‍. ഇതിനെ സാധൂകരിക്കുന്ന നിര്‍ണായക തെളിവുകളുമായി ഗവേഷകര്‍. സഊദി കമ്മിഷന്‍ ഫോര്‍ ടൂറിസം ആന്‍ഡ് നാഷണല്‍ ഹെറിറ്റേജിന്റെ ആഭിമുഖ്യത്തില്‍ സഊദി-ഫ്രഞ്ച് സംയുക്ത പര്യവേക്ഷക സംഘം നടത്തിയ ഗവേഷണത്തിലാണ് അപൂര്‍വ കണ്ടെത്തല്‍. തലസ്ഥാന നഗരിയായ റിയാദിന് തെക്കു ഭാഗത്തെ അല്‍ ഖര്‍ജ് പര്‍വതനിരകളില്‍നിന്നു വാദി നസാഹിലേക്ക് നീണ്ടുകിടക്കുന്ന മലനിരകളിലും വാദി മാവാന്‍, ഐന്‍ ഫുര്‍സാന്‍ എന്നിവിടങ്ങളിലെ മലമ്പ്രദേശത്തും അല്‍ ശദീദ ഗ്രാമത്തിലെ പര്‍വതപ്രദേശത്തും നടത്തിയ പുരാവസ്തു ഗവേഷണങ്ങളിലാണ് അതിപുരാതനകാലത്ത് തന്നെ ഇവിടങ്ങളില്‍ മനുഷ്യവാസം ഉണ്ടായിരുന്നുവെന്ന് കണ്ടെത്തിയത്. 

തെളിവായി ഏതാനും പുരാവസ്തുക്കളും ഇവിടെനിന്നു കണ്ടെടുത്തിട്ടുണ്ട്. രാജ്യത്തിന്റെ മനുഷ്യവാസ ചരിത്രത്തെ പൗരാണികതയിലേക്ക് കൊണ്ടുപോകുന്ന പാലിയോലിത്തിക്ക് കാലഘട്ടത്തിലേക്ക് വെളിച്ചംവീശുന്ന ഈ തെളിവുകള്‍ ശിലായുഗ കാലഘട്ടത്തില്‍ തന്നെ ഈ പ്രദേശം ജനവാസ മേഖലയായിരുന്നുവെന്നാണ് ഗവേഷകര്‍ കരുതുന്നത്.
കടും പച്ചയും ഇളം പച്ചയും നിറത്തിലുള്ള പാത്രങ്ങള്‍, കല്‍പാത്രങ്ങള്‍, മഞ്ഞ, ചുവപ്പ്, നീല നിറത്തിലുള്ള സ്ഫടിക നിര്‍മിത കൈവളകള്‍, ഇരുമ്പ് കൊണ്ടുള്ള പിഞ്ഞാണം, മറ്റു പാത്രങ്ങള്‍ എന്നിവ ഗവേഷകര്‍ക്ക് ഉദ്ഖനത്തില്‍ ലഭിച്ചു. ഇതോടൊപ്പം, അല്‍ ഖര്‍ജ് മരുപ്പച്ചയുടെ പടിഞ്ഞാറ് ഭാഗത്ത് അല്‍ ദിലഅ് തടാകത്തോട് ചേര്‍ന്ന് 5,000 വര്‍ഷം മുന്‍പ് മനുഷ്യര്‍ താമസിച്ചിരുന്നുവെന്നും കണ്ടെത്തിയിട്ടുണ്ട്. ഇവിടെനിന്ന് 56 സെന്റിമീറ്റര്‍ നീളമുള്ള വെങ്കല നിര്‍മിത വാള്‍ ഗവേഷകര്‍ക്ക് ലഭിച്ചു. ഇത്ക്രിസ്തുവിനും ആയിരം വര്‍ഷം മുന്‍പുള്ളതാണെന്നാണ് അനുമാനം.പൗരാണിക ജനതയുടെ കൃഷിസ്ഥലം, കെട്ടിടാവശിഷ്ടങ്ങള്‍ എന്നിവയും ഇവിടെനിന്നു കണ്ടെടുക്കാനായിട്ടുണ്ട്. അറേബ്യന്‍ ഉപഭൂഖണ്ഡത്തിലെ മധ്യ മേഖലയില്‍ കണ്ടിരുന്ന പുള്ളിയും കുത്തുമില്ലാത്ത ലിപികളും ഇവിടെ കാണാനായിട്ടുണ്ട്.
2011 സെപ്റ്റംബറിലാണ് സഊദി ടൂറിസം, നാഷണല്‍ ഹെറിറ്റേജ് കമ്മിഷനുമായി പുരാവസ്തു പര്യവേക്ഷണത്തില്‍ സഹകരിക്കുന്നതിന് ഫ്രാന്‍സ് കരാര്‍ ഒപ്പുവച്ചത്. സഊദികളും ഫ്രഞ്ചുകാരും ഉള്‍പ്പെട്ട പതിനെട്ടംഗ സംഘമാണ് കണ്ടെത്തലിനു പിന്നില്‍. രാജ്യത്തിന്റെ വിവിധ ഭാഗങ്ങളില്‍ നേരത്തെയും സംഘം വിവിധ തെളിവുകള്‍ കണ്ടെത്തിയിരുന്നു.