കണ്ണൂര്‍: കണ്ണൂര്‍ സര്‍വകലാശാല താവക്കര ആസ്ഥാനത്ത് മാലിന്യ
ടാങ്കായി മാറുകയാണ് സമീപത്തെ ഓവുചാല്‍. പ്രധാന പ്രവേശനകവാടത്തിലൂടെ ആസ്ഥാനമന്ദിരത്തിലേക്കു പോകുന്ന റോഡിനു കുറുകെയാണ് സ്ലാബ് പോലും ഇല്ലാത്ത ഓവുചാലുള്ളത്.
സമീപത്തെ ജനവാസ കേന്ദ്രത്തില്‍ നിന്നും സ്ഥാപനങ്ങളില്‍ നിന്നും വരെ ഈ ഓവുചാലിലേക്കാണ് മലിനജലമെത്തുന്നത്. എന്നാല്‍ മലിനജലം എവിടേക്കും ഒഴുകാതെ തളംകെട്ടി നില്‍ക്കുകയാണ്. നേരത്തെ മലിനജല പ്രശ്‌നം രൂക്ഷമായപ്പോള്‍ മോട്ടോര്‍ ഉപയോഗിച്ച് വെള്ളം മാറ്റുകയും മാലിന്യം നീക്കുകയും ചെയ്തിരുന്നു. എന്നാല്‍ ഇക്കുറിയും സമാനരീതിയില്‍ വെള്ളം കെട്ടിക്കിടക്കുകയാണ്. ഓവുചാലിന്റെ പരിസരങ്ങളില്‍ കാടുകള്‍ മൂടിക്കിടക്കുകയും തെരുവുനായകള്‍ സംഘമായി എത്തുകയും ചെയ്യുന്നുണ്ട്.
മഴക്കാലമെത്തുന്നതോടെ വെള്ളം പമ്പ് ചെയ്യുകയും മാലിന്യം നീക്കുകയും ചെയ്യേണ്ടതുണ്ട്. പ്രധാന പ്രവേശന കവാടം വഴി സര്‍വകലാശാലയിലേക്ക് കയറുന്ന ഭാഗത്തെങ്കിലും ഓവുചാലിനു സ്ലാബ് സ്ഥാപിക്കണമെന്നാണ് പ്രദേശവാസികളുടെയും സര്‍വകലാശാലയിലെത്തുന്നവരുടെയും ആവശ്യം.