മക്ക: ഈ വര്‍ഷത്തെ ആദ്യ ഇന്ത്യന്‍ ഹജ്ജ് തീര്‍ഥാടക സംഘം ജൂലൈ നാലിനു മദീനയില്‍ എത്തും. ഡല്‍ഹിയില്‍ നിന്നുള്ള 420 പേരടങ്ങുന്ന തീര്‍ഥാടക സംഘമാണ് എയര്‍ ഇന്ത്യ എ.ഐ 5001 വിമാനത്തില്‍ മദീന പ്രിന്‍സ് മുഹമ്മദ് അന്താരാഷ്ട്ര വിമാനത്താവളത്തില്‍ ജൂലൈ നാലിന് എത്തുക. ഇതോടെ ഈ വര്‍ഷത്തെ ഇന്ത്യയില്‍ നിന്നുള്ള ഹജ്ജ് തീര്‍ഥാടകരുടെ വരവിന് തുടക്കമാവും.

മലയാളി ഹാജിമാരുള്‍പ്പെടെ ഈ വര്‍ഷം മദീനയില്‍ 61,000 തീര്‍ഥാടകരാണ് എത്തുന്നത്. ജൂലൈ ഏഴു മുതലാണ് മലയാളി തീര്‍ഥാടകര്‍ മദീനയില്‍ എത്തി തുടങ്ങുന്നത്. കരിപ്പൂരില്‍ നിന്ന് ഏഴാം തിയതി സഊദി എയര്‍ലെന്‍സിന്റെ എസ്.വി 5749 എന്ന വിമാനത്തില്‍ ഉച്ചക്ക് 1:35 ന് 300 ഹാജിമാരുമായി മലയാളി തീര്‍ഥാടകരുടെ ആദ്യ സംഘം മദീനയിലെത്തും.
തുടര്‍ന്ന് 20ാം തിയതി വരെ കരിപ്പൂരില്‍ നിന്ന് സൗദി എയര്‍ലൈനിന്റെ 35 വിമാനങ്ങളിലായി 10,500 ഹാജിമാരും ലക്ഷദ്വീപിലെ 352 ഹാജിമാരടക്കം നെടുമ്പാശേിരിയില്‍ നിന്ന് 14ാം തിയതി മുതല്‍ എട്ട് വിമാനങ്ങളിലായി 2800 മലയാളി ഹാജിമാരും പ്രവാചക നഗരിയിലെത്തും.

മദീനയിലെത്തുന്ന ആദ്യ സംഘങ്ങള്‍ക്ക് മസ്ജിദുന്നബവിയുടെ പരിസരങ്ങളില്‍ ഏറ്റവും സൗകര്യപ്രദമായ മര്‍കസിയയിലെ ഹോട്ടലുകളിലാണ് താമസ സൗകര്യം ഏര്‍പ്പെടുത്തിയിരിക്കുന്നത്.