കൊച്ചി: കെ.ടെറ്റ് പരീക്ഷയുടെ വിജയശതമാനം തീരുമാനിക്കുന്നത് സംബന്ധിച്ച് മൂന്നാഴ്ചയ്ക്കകം നിലപാട് വ്യക്തമാക്കണമെന്ന് സംസ്ഥാന പിന്നോക്ക വിഭാഗ കമ്മിഷന്‍ സര്‍ക്കാരിനോട് ആവശ്യപ്പെട്ടു. എറണാകുളം ഗസ്റ്റ് ഹൗസില്‍ ഇന്നലെ നടന്ന സിറ്റിങില്‍ കമ്മിഷന്‍ ചെയര്‍മാന്‍ ജസ്റ്റിസ് ജി. ശിവരാജനാണ് നിര്‍ദേശം നല്‍കിയത്. പരീക്ഷ എഴുതിയ നൂറ് വിദ്യാര്‍ഥികളുടെ പരാതിയെ തുടര്‍ന്ന് പരീക്ഷാമൂല്യനിര്‍ണയത്തില്‍ സംവരണ വിഭാഗങ്ങള്‍ക്ക് മാര്‍ക്ക് ഇളവ് നല്‍കുന്നതുമായി ബന്ധപ്പെട്ട് മാര്‍ക്ക് കണക്കാക്കിയതില്‍ പിഴവ് സംഭവിച്ചത് പരിഹരിക്കാന്‍ കമ്മിഷന്‍ നിര്‍ദേശം നല്‍കിയിരുന്നു. എന്നാല്‍ വിഷയം നിയമവകുപ്പിന്റെ ഉപദേശത്തിനായി അയച്ചിരിക്കുകയാണെന്നും വ്യക്തമായ മറുപടി ലഭിക്കാത്തതിനാലാണ് നിലപാട് അറിയിക്കാത്തതെന്നും കൂടുതല്‍ സമയം അനുവദിക്കണമെന്നും സര്‍ക്കാര്‍ കമ്മിഷനെ അറിയിച്ചു. ഇതേ തുടര്‍ന്നാണ് കമ്മിഷന്‍ മൂന്നാഴ്ചയ്ക്കുള്ളില്‍ അഭിപ്രായം വ്യക്തമാക്കാന്‍ സര്‍ക്കാരിനോട് ആവശ്യപ്പെട്ടത്.
150 മാര്‍ക്കിനുള്ള പരീക്ഷയില്‍ 60 ശതമാനമായ 90 ആണ് യോഗ്യത നേടാന്‍ വേണ്ടത്. പിന്നോക്ക വിഭാഗത്തിന് ആകെ മാര്‍ക്കിന്റെ 55 ശതമാനമായ 82.5 ലഭിച്ചാല്‍ മതിയാകും. എന്നാല്‍, മിനിമം മാര്‍ക്കായ 90ന്റെ അഞ്ചുശതമാനം മാത്രമാണു പിന്നോക്ക വിഭാഗങ്ങള്‍ക്ക് ഇളവ് ലഭിക്കുക എന്നാണ് സര്‍ക്കാര്‍ വാദം. ഇതനുസരിച്ച് 82.5 മാര്‍ക്കിനു പകരം മിനിമം മാര്‍ക്കായ 90ല്‍ അഞ്ചുശതമാനം ഇളവോടെ 85.5 മാര്‍ക്ക് നേടിയാലേ പിന്നോക്ക വിഭാഗങ്ങള്‍ക്കു യോഗ്യത നേടാനാകൂ.
അടുത്തമാസം ആദ്യവാരം തിരുവനന്തപുരത്ത് നടക്കുന്ന സിറ്റിങില്‍ കമ്മിഷന്‍ കെ.ടെറ്റ് പരീക്ഷ സംബന്ധിച്ച് ഉത്തരവിറക്കിയേക്കും.