മാഡ്രിഡ്: സൂപ്പര്‍ താരം ക്രിസ്റ്റ്യാനോ റൊണാള്‍ഡോയുടെ ഇരട്ട ഗോള്‍ മികവില്‍ സെല്‍റ്റ വിഗോയെ 4-1ന് പരാജയപ്പെടുത്തി റയല്‍ മാഡ്രിഡ് സ്പാനിഷ് ലാ ലിഗ കിരീടത്തിനരികെയെത്തി. അവസാന മത്സരത്തില്‍ സമനില സ്വന്തമാക്കിയാല്‍ റയലിന് കിരീടത്തില്‍ മുത്തമിടാം. ജയത്തോടെ 93 പോയിന്റുമായി ബാഴ്‌സലോണയെ രണ്ടാം സ്ഥാനത്തേക്ക് പിന്തള്ളി റയല്‍ തലപ്പത്തെത്തി. അവസാന മത്സരത്തില്‍ ബാഴ്‌സലോണ വിജയിക്കുകയും റയല്‍ തോല്‍ക്കുകയും ചെയ്താല്‍ മാത്രം ബാഴ്‌സയ്ക്ക് കിരീടം സ്വന്തമാക്കാം.
ആദ്യ പകുതിയില്‍ ഒന്നും രണ്ടാം പകുതിയില്‍ മൂന്നും ഗോളുകളാണ് റയല്‍ എതിരാളിയുടെ വലയില്‍ നിക്ഷേപിച്ചത്. ക്രിസ്റ്റ്യാനോ ഇരട്ട ഗോളുകള്‍ നേടിയപ്പോള്‍ കരിം ബെന്‍സെമ, ടോണി ക്രൂസ് എന്നിവര്‍ ശേഷിച്ച ഗോളുകള്‍ക്ക് അവകാശികളായി. കളി തുടങ്ങി പത്താം മിനുട്ടില്‍ തന്നെ ക്രിസ്റ്റ്യാനോ റയലിനെ മുന്നില്‍ കടത്തി. പിന്നീട് രണ്ടാം പകുതി തുടങ്ങി 48ാം മിനുട്ടില്‍ തന്റെ രണ്ടാം ഗോളിലൂടെ ക്രിസ്റ്റ്യാനോ റയലിനെ വീണ്ടും മുന്നിലെത്തിച്ചു. 69ാം മിനുട്ടില്‍ സെല്‍റ്റ ഒരു ഗോള്‍ മടക്കി ലീഡ് കുറച്ചു. 70ാം മിനുട്ടില്‍ ബെന്‍സെമ മൂന്നാം ഗോളിലൂടെ ലീഡുയര്‍ത്തിയപ്പോള്‍ 88ാം മിനുട്ടില്‍ ക്രൂസ് പട്ടികയും വിജയവും പൂര്‍ത്തിയാക്കി.
ഈ മാസം 21ന് കിരീടമാര്‍ക്കെന്ന് നിര്‍ണയിക്കുന്ന പോരാട്ടങ്ങള്‍ അരങ്ങേറും. ബാഴ്‌സലോണ സ്വന്തം തട്ടകത്തില്‍ എയ്ബറുമായും റയല്‍ എവേ പോരാട്ടത്തില്‍ മലാഗയുമായും ഏറ്റുമുട്ടും.

മാഞ്ചസ്റ്റര്‍ യുനൈറ്റഡിന് സമനില
ലണ്ടന്‍: ഇംഗ്ലീഷ് പ്രീമിയര്‍ ലീഗ് പോരാട്ടത്തില്‍ മാഞ്ചസ്റ്റര്‍ യുനൈറ്റഡിന് സമനില. സതാംപ്ടനുമായാണ് യുനൈറ്റഡ് സമനില വഴങ്ങിയത്. ഡേവിഡ് ഡി ജിയക്ക് പകരം ഗോള്‍ വല കാത്ത റൊമേറോയുടെ മികവാണ് തോല്‍വിയില്‍ നിന്ന് മാഞ്ചസ്റ്ററിനെ രക്ഷിച്ചത്. പെനാല്‍റ്റിയടക്കം ഗോളെന്നുറച്ച നിരവധി ഷോട്ടുകള്‍ താരം തടുത്തിട്ടു.