ജില്ലയില്‍ മുന്നണികള്‍ സ്ഥാനാര്‍ഥികളെ പ്രഖ്യാപിച്ചു തുടങ്ങിയതോടെ പല പ്രദേശങ്ങളിലും സ്ഥാനാര്‍ഥികള്‍ക്കെതിരേ സ്വന്തം പാര്‍ട്ടിക്കാര്‍ തന്നെ പ്രതിഷേധവുമായി ഇറങ്ങി. ഇത്തരം നീക്കങ്ങള്‍ കണ്ടെത്തി എതിര്‍ പാര്‍ട്ടിയിലെ പ്രതിഷേധക്കാരുടെ വോട്ടുകള്‍ തങ്ങളുടെ പെട്ടിയില്‍ വീഴ്ത്തിയാല്‍ തദ്ദേശ സ്ഥാപനങ്ങളില്‍ ഭരണം പിടിച്ചെടുക്കാമെന്ന നിഗമനത്തിലാണ് കാസര്‍കോട് മുന്നണി നേതാക്കള്‍. ജില്ലയിലെ പ്രബല കക്ഷിയായ മുസ്‌ലിം ലീഗ് നേരിടുന്ന രാഷ്ട്രീയ പ്രതിസന്ധി മറികടക്കാന്‍ പ്രചാരണത്തിന് പ്രമുഖ നേതാക്കളെ തന്നെ എത്തിക്കാനാണ് യു.ഡി.എഫ് നീക്കം.
കാസര്‍കോട് നഗരസഭയില്‍ യു.ഡി.എഫാണ് കാലങ്ങളായി ഭരണം നടത്തി വരുന്നത്. എന്നാല്‍ ജില്ലാ പഞ്ചായത്ത് ഭരണം മാറി മാറി ഇടത്, വലത് മുന്നണികളാണ് നടത്തി വരുന്നത്. പല തെരഞ്ഞെടുപ്പുകളിലും ഒന്നോ രണ്ടോ സീറ്റുകളുടെ വ്യത്യാസത്തിലാണ് ജില്ലാ പഞ്ചായത്ത് ഭരണം ഇടത്, വലത് മുന്നണികള്‍ പിടിച്ചെടുക്കുന്നത്. കഴിഞ്ഞ തവണ യു.ഡി.എഫ് ജില്ലാ പഞ്ചായത്ത് ഭരണം പിടിച്ചെടുത്തത് ഒരു സീറ്റിന്റെ വ്യത്യാസത്തിലാണ്. യു.ഡി.എഫിന് എട്ടും എല്‍.ഡിഎഫിനു ഏഴും സീറ്റുകളാണ് ജില്ലാ പഞ്ചായത്തില്‍ ഉണ്ടായിരുന്നത്. രണ്ടു സീറ്റുകള്‍ ബി.ജെപിക്കും ലഭിച്ചു.
അതേസമയം ജില്ലയില്‍ കഴിഞ്ഞ തവണ പുതുതായി വന്ന നീലേശ്വരം നഗരസഭയില്‍ എല്‍.ഡി എഫിനായിരുന്നു ഭരണം. എന്നാല്‍ ഇത്തവണ സ്ഥാനാര്‍ഥി പ്രഖ്യാപനം വന്നപ്പോള്‍ തന്നെ ഇടതു മുന്നണിയില്‍ പല വാര്‍ഡുകളിലും പൊട്ടിത്തെറി തുടങ്ങിയിട്ടുണ്ട്.