ഹിദായ നഗര്‍: ദാറുല്‍ഹുദാ ഇസ്‌ലാമിക് സര്‍വകലാശാലയിലെയും ഇതര യു.ജി കോളജുകളിലെയും സെക്കന്‍ഡറി ഒന്നാം വര്‍ഷത്തിലേക്ക് പ്രവേശനം ലഭിച്ച വിദ്യാര്‍ഥികളുടെ പ്രവേശനോത്സവം വര്‍ണാഭമായി. പരിപാടിയുടെ സംസ്ഥാനതല ഉദ്ഘാടനം വാഴ്‌സിറ്റിയില്‍ ചാന്‍സലര്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്തു.
സമഗ്ര ശാക്തീകരണത്തിന് നേതൃത്വം നല്‍കാന്‍ യോഗ്യരായ പണ്ഡിതരെയാണ് സമൂഹത്തിനാവശ്യമെന്ന് തങ്ങള്‍ അഭിപ്രായപ്പെട്ടു. കാലോചിതമായി ഇടപെടാനും സംവദിക്കാനും പ്രാപ്തരായ പണ്ഡിതരെ വാര്‍ത്തെടുക്കുകയും അവരിലൂടെ സാമൂഹിക ശാക്തീകരണം സാധ്യമാക്കുകയുമാണ് രാജ്യവ്യാപകമായുള്ള ദാറുല്‍ഹുദായുടെ വിദ്യാഭ്യാസ പദ്ധതികളിലൂടെ ലക്ഷ്യമാക്കുന്നതെന്നും തങ്ങള്‍ പറഞ്ഞു.
വാഴ്‌സിറ്റിയിലെ സെക്കന്‍ഡറിയിലേക്കും നാഷനല്‍ ഇന്‍സ്റ്റിറ്റ്യൂട്ടിലേക്കും മമ്പുറം ഹിഫ്‌ളുല്‍ ഖുര്‍ആന്‍ കോളജിലേക്കും പുതുതായി പ്രവേശനം ലഭിച്ച വിദ്യാര്‍ഥികള്‍ക്ക് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ആദ്യപാഠം ചൊല്ലിക്കൊടുത്തു. ദാറുല്‍ഹുദാ വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനായി.സയ്യിദ് മുഹമ്മദ് കോയ തങ്ങള്‍ ജമലുല്ലൈലി, ചെമ്മുക്കന്‍ കുഞ്ഞാപ്പു ഹാജി, കെ.എം സൈതലവി ഹാജി കോട്ടക്കല്‍, യു. ശാഫി ഹാജി ചെമ്മാട്, ഡോ. യു.വി.കെ മുഹമ്മദ്, കെ.സി മുഹമ്മദ് ബാഖവി, ഇബ്രാഹീം ഫൈസി കരുവാരക്കുണ്ട്, സി.യൂസുഫ് ഫൈസി മേല്‍മുറി, അബ്ബാസ് ഹുദവി കരുവാരക്കുണ്ട്, എം.കെ ജാബിറലി ഹുദവി, പി.കെ നാസ്വിര്‍ ഹുദവി എന്നിവര്‍ സംബന്ധിച്ചു. വാഴ്‌സിറ്റിയുടെ വിവിധ യു.ജി കോളജുകളില്‍ നടന്ന പ്രവേശനോത്സവ പരിപാടിയില്‍ പ്രമുഖ പണ്ഡിതര്‍ വിദ്യാര്‍ഥികള്‍ക്ക് ആദ്യപാഠം ചൊല്ലിക്കൊടുത്തു.