കൊച്ചി: പ്രവാസി വ്യവസായി ആന്തൂര്‍ സ്വദേശി പാറയില്‍ സാജന്‍ ആത്മഹത്യ ചെയ്ത കേസില്‍ ആരെയും പ്രതിയാക്കിയിട്ടില്ലെന്ന് സര്‍ക്കാര്‍ ഹൈക്കോടതിയെ അറിയിച്ചു. സര്‍ക്കാര്‍ വിശദീകരണം രേഖപ്പെടുത്തിയ കോടതി നഗരസഭാ മുന്‍ സെക്രട്ടറി ഗിരീഷിന്റെ മുന്‍കൂര്‍ ജാമ്യ ഹരജിയിലെ തുടര്‍നടപടികള്‍ അവസാനിപ്പിച്ചു.
നഗരസഭാ സെക്രട്ടറി എം.കെ ഗിരീഷ് അടക്കമുള്ളവര്‍ ഇപ്പോള്‍ പ്രതിയല്ല. അന്വേഷണം പുരോഗമിക്കുകയാണന്നും പ്രോസിക്യൂഷന്‍ കോടതിയെ അറിയിച്ചു. സാജന്‍ ആത്മഹത്യ ചെയ്ത സംഭവത്തില്‍ താന്‍ കുറ്റക്കാരനല്ലെന്നും മാധ്യമവാര്‍ത്തകള്‍ പ്രകാരം പൊലിസ് അറസ്റ്റ് ചെയ്യാന്‍ സാധ്യത ഉണ്ടന്നും ചൂണ്ടിക്കാട്ടിയാണ് ഗിരീഷ് മുന്‍കൂര്‍ ജാമ്യ ഹരജി സമര്‍പ്പിച്ചത്. സാജന്റെ ആത്മഹത്യയെ തുടര്‍ന്ന് ഗിരീഷ് ഉള്‍പ്പെടെയുള്ള ഉദ്യോഗസ്ഥര്‍ ഒളിവിലാണ്.