വടക്കാഞ്ചേരി: പ്രളയം തകര്‍ത്ത കാര്‍ഷിക മേഖലയുടെ പുനരുദ്ധാരണത്തിനായി കര്‍ഷകര്‍ അഹോരാത്രം പോരാടുമ്പോള്‍ തിരിച്ചടിയായി വിവിധ ഫംഗസുകളും കാര്‍ഷിക മേഖലയില്‍ നിറയുന്നു. കൃഷിയിടങ്ങളുടെ ഘടന തന്നെ ഇല്ലാതായത് മൂലം കര്‍ഷകര്‍ കൊടിയ ദുരിതം അനുഭവിയ്ക്കുമ്പോഴാണ് മില്ലി ബഗ് (മില്ലിമൂട്ട) അടക്കമുള്ളവയുടെ ആക്രമണം ഇരുട്ടടിയാകുന്നത്.
കാര്‍ഷിക വിളകളില്‍ വെളുത്ത നിറത്തില്‍ പഞ്ഞി പോലെയാണ് ഇവ കാണപ്പെടുന്നത്. തെങ്ങുകളിലും ഇവ ധാരാളമായി പടര്‍ന്നു പിടിയ്ക്കുന്നു. ചെടികളുടെ ഇലകളിലും ഫലത്തിലും പറ്റിപിടിച്ചിരിയ്ക്കുന്ന മില്ലിമൂട്ടകള്‍ ചെടികളേയും ഫലങ്ങളേയും ഒരു പോലെ നശിപ്പിയ്ക്കുകയാണ്.
വളരെ വേഗം പടര്‍ന്ന് പന്തലിച്ച് നീരൂറ്റി കുടിയ്ക്കുകയാണ് ഇവ ചെയ്യുന്നത്. ഇതുമൂലം ചെടിയൊന്നാകെ നശിക്കുന്ന അവസ്ഥയാണ്. കേരകര്‍ഷകരാണ് വലിയ പ്രയാസം അനുഭവിയ്ക്കുന്നത്. കൊള്ളി (മരച്ചീനി) , പപ്പായ, വിവിധ പച്ചക്കറികള്‍, മുളക് എന്നിവയും മില്ലിമൂട്ടയുടെ ആക്രമണത്തില്‍ അനുദിനം ഇല്ലാതെയാവുകയാണ്. നേരത്തെ ഇവ വ്യാപകമായിരുന്നെങ്കിലും പ്രതിരോധത്തെ തുടര്‍ന്ന് പിന്‍ വാങ്ങിയിരുന്ന മില്ലിമുട്ടകള്‍ വീണ്ടും കളം നിറയുന്നതോടെ കര്‍ഷകരുടെ വേദനയും ദുരിതവും ഇരട്ടിയാവുകയാണ്.