ശ്രീകണ്ഠപുരം: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച സംഭവത്തില്‍ നാലുപേരെ അറസ്റ്റുചെയ്തു. കാഞ്ഞിരക്കൊല്ലി സ്വദേശിയും കണ്ണൂര്‍ ചാലയില്‍ താമസക്കാരനും പത്രം ഏജന്റുമായ കിഴക്കേടത്ത് ജോസ് സ്‌കറിയ എന്ന ജോസ്‌കുട്ടി (28), കാഞ്ഞിരക്കൊല്ലിയിലെ മലഞ്ചരക്കു വ്യാപാരി പൂവാട്ടാരകത്ത് അഷ്‌റഫ് (32), കാഞ്ഞിരക്കൊല്ലിയിലെ മേനാച്ചേരി ഷിന്റോ (30), ഉളിക്കല്‍ വട്ട്യാംതോട് സ്വദേശിയും വേദപാഠ അധ്യാപകനും ടൈല്‍സ് തൊഴിലാളിയുമായ കദളിക്കാട് ബിനോയി (40) എന്നിവരെയാണ് ശ്രീകണ്ഠപുരം സി.ഐ സി.എ അബ്ദുല്‍ റഹീം, പയ്യാവൂര്‍ എസ്.ഐ ശിവന്‍ ചോടോത്ത് എന്നിവരുടെ നേതൃത്വത്തില്‍ പിടികൂടിയത്. അഷ്‌റഫും, ഷിന്റോയും പെണ്‍കുട്ടിയുടെ വീട്ടില്‍ വച്ചും ജോസ് സ്‌കറിയ സ്വന്തം വീട്ടില്‍ വച്ചും പീഡിപ്പിച്ചുവെന്നാണ് കേസ്. കണ്ണൂര്‍ വനിതാ സെല്‍ എസ്.ഐ പെണ്‍കുട്ടിയില്‍ നിന്ന് മൊഴിയെടുത്ത ശേഷം കേസെടുക്കാന്‍ പയ്യാവൂര്‍ പൊലിസിനു നിര്‍ദേശം നല്‍കുകയായിരുന്നു. പ്രതികളെ തളിപ്പറമ്പ് കോടതി റിമാന്‍ഡ് ചെയ്തു.