മലപ്പുറം: പുതിയ സര്‍ക്കാര്‍ അധികാരമേറ്റ ശേഷം ജില്ലയില്‍ 2,214 പട്ടയങ്ങള്‍ വിതരണം ചെയ്തതായി ജില്ലാ കലക്ടര്‍ അമിത് മീണ അറിയിച്ചു. മുഖ്യമന്ത്രിയുടെ ദുരിതാശ്വാസ നിധിയില്‍നിന്ന് അവശത അനുഭവിക്കുന്നവര്‍ക്കായി 7.89 കോടി രൂപ വിതരണം ചെയ്തു.
ദേശീയ കുടുംബക്ഷേമനിധിയില്‍നിന്നു 38 പേര്‍ക്ക് 20,000 രൂപ വീതം 7.60 ലക്ഷം രൂപ വിതരണം ചെയ്തു. വിധവകളുടെ പെണ്‍മക്കളുടെ വിവാഹ ധനസഹായമായി 1,479 പേര്‍ക്ക് 4.43 കോടി രൂപ നല്‍കിയിട്ടുണ്ട്. ബില്‍ഡിങ്  ടാക്‌സ് ഇനത്തില്‍ 15.86 കോടി രൂപയും ആഢംബര നികുതി ഇനത്തില്‍ 2.34 കോടി രൂപയും പിരിച്ചെടുത്തു.  
സംസ്ഥാനത്ത് മുഴുവന്‍ ഭവനരഹിതര്‍ക്കും വീട് നല്‍കുന്നതിനു സര്‍ക്കാര്‍ തയാറാക്കിയ ലൈഫ് മിഷന്‍ പദ്ധതി ജില്ലയില്‍ പാര്‍പ്പിട സമുച്ചയം നിര്‍മിക്കുന്നതിന് എടപ്പാള്‍ ഗ്രാമപഞ്ചായത്തില്‍ 1.45 ഏക്കര്‍ ഭൂമി കണ്ടെത്തി. റവന്യൂ, രജിസ്‌ട്രേഷന്‍ വകുപ്പുകളെ ബന്ധിപ്പിച്ചു ജില്ലയിലെ 138 വില്ലേജുകളില്‍ ഓണ്‍ലൈന്‍ പോക്കുവരവ് സംവിധാനം നടപ്പിലാക്കി. എം.എല്‍.എമാരുടെ പ്രാദേശിക വികസന നിധിയില്‍നിന്ന് 14.10 കോടി രൂപയുടെ പ്രവൃത്തികള്‍ നടപ്പിലാക്കിവരുന്നു.
ന്യൂനപക്ഷ വിഭാഗങ്ങള്‍ക്ക് വീട് നിര്‍മിക്കുന്നതിന് 6.5 കോടി രൂപ ജില്ലയ്ക്കു ലഭിച്ചു. പ്രകൃതി ദുരന്തത്തില്‍ വീട് നശിച്ചവര്‍ക്ക് 43.8 ലക്ഷവും മരിച്ചവരുടെ ബന്ധുകള്‍ക്ക് 52 ലക്ഷം രൂപയും അനുവദിച്ചു. 140 റോഡുകളുടെ നവീകരണത്തിനായി വെള്ളപ്പൊക്ക നിര്‍മാണ പ്രവൃത്തിയില്‍ ഉള്‍പ്പെടുത്തി 4.79 കോടി രൂപയുടെ ഭരണാനുമതി നല്‍കി.  കഞ്ഞിപ്പുര-മൂടാല്‍ ബൈപാസ് റോഡിന് ഭൂമി ഏറ്റെടുക്കുന്നതിന് 3.50 കോടി രൂപയും നിലമ്പൂര്‍ ബൈപാസിന് 13.18 കോടി രൂപയും മലപ്പുറം കോട്ടപ്പടി ബൈപാസിന് 23.95 കോടിയും ലഭ്യമായിട്ടുണ്ട്. ഈ തുക ഗുണഭോക്താക്കള്‍ക്ക് നല്‍കാന്‍ നടപടി സ്വീകരിച്ചുവരുന്നു. മുഖ്യമന്ത്രിയുടെ സാന്ത്വനം ഫണ്ടില്‍ 57,365 അപേക്ഷകളാണ് ഇതുവരെ ലഭിച്ചത്.