ചക്കരക്കല്‍: പൊലിസ് സ്‌റ്റേഷനു ബോംബെറിഞ്ഞ കേസില്‍ രണ്ടുപേര്‍ അറസ്റ്റില്‍.  
കാപ്പാട് പെരിക്കാട് അരയാക്കണ്ടി പ്രജില്‍ (25), പി.പി ഹൗസില്‍ റയീസ് (23) എന്നിവരെയാണ് ചക്കരക്കല്‍ എസ്.ഐ  പി.ബിജുവിന്റെ നേതൃത്വത്തിലുളള പൊലിസ് സംഘം  താഴെചൊവ്വയില്‍ നിന്ന് അറസ്റ്റ് ചെയ്തത്.
 തലശേരി സി.ജെ. എം കോടതിയില്‍ ഹാജരാക്കിയ ഇവരെ രണ്ടാഴ്ചത്തേക്ക് റിമാന്‍ഡ് ചെയ്തു.  പ്രതികളെ കസ്റ്റഡിയില്‍ വിട്ടുനല്‍കണമെന്ന പൊലിസിന്റെ അപേക്ഷ പരിഗണിച്ച് ഇവരെ കൂടുതല്‍ ചോദ്യംചെയ്യാനായി പൊലിസ് കസ്റ്റഡിയില്‍വിട്ടു.  
ജൂലൈ  ആറിന് പുലര്‍ച്ചെ നാലുമണിക്കാണ് ബൈക്കിലെത്തിയ സംഘം പൊലിസ് സ്‌റ്റേഷനുനേരെ ബോംബെറിഞ്ഞത്. ഡ്യൂട്ടിയിലുണ്ടായിരുന്ന പൊലിസുകാര്‍ ശബ്ദംകേട്ട് ഓടിയെത്തുമ്പോഴേക്കും പ്രതികള്‍ ബൈക്കില്‍ രക്ഷപ്പെട്ടു.  
ഇതിന്റെ തലേദിവസം സി.പി. എം പ്രവര്‍ത്തകനായ നിധീഷിനെ അക്രമിക്കുകയും  സഞ്ചരിച്ച ബൈക്ക്‌കേടുവരുത്തുകയും ചെയ്തിരുന്നു.  ഈസംഭവത്തില്‍ അഞ്ചുപേര്‍ക്കെതിരേ പൊലിസ് കേസെടുത്തിരുന്നു. ന
ഇവരെ പിടികൂടാനായി ചക്കരക്കല്‍  എസ്.ഐയുടെ നേതൃത്വത്തില്‍ കാപ്പാട്‌മേഖലയില്‍ വീടുകളില്‍ വ്യാപകമായ റെയ്ഡ് നടത്തിയിരുന്നു. ഇതില്‍ പ്രതിഷേധിച്ചാണ് ബേംബേറ് നടന്നതെന്നാണ് പൊലിസ് നിഗമനം.