അക്രമം പ്രണയാഭ്യര്‍ഥന നിരസിച്ചതിന്

ശാസ്താംകോട്ട (കൊല്ലം): പ്രണയാഭ്യര്‍ഥന നിരസിച്ച പ്ലസ്ടു വിദ്യാര്‍ഥിനിയെ യുവാവ് പുലര്‍ച്ചെ വീടിന്റെ ടെറസിലൂടെ അകത്തുകയറി കുത്തിപ്പരുക്കേല്‍പ്പിച്ചു. സ്‌ക്രൂ ഡ്രൈവര്‍ കൊണ്ടുള്ള കുത്തേറ്റ് ഗുരുതരാവസ്ഥയില്‍ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ച പെണ്‍കുട്ടി അപകടനില തരണം ചെയ്തിട്ടുണ്ട്. ഇന്നലെ പുലര്‍ച്ചെ 1.30 ഓടെ കുന്നത്തൂര്‍ തോട്ടത്തുംമുറി സ്വദേശിനിക്കാണ് കുത്തേറ്റത്. സംഭവത്തില്‍ കൊട്ടാരക്കര-ചവറ റൂട്ടില്‍ സര്‍വിസ് നടത്തുന്ന സ്വാതി ബസിലെ കണ്ടക്ടര്‍ ഭരണിക്കാവ് സ്വദേശി അനന്ദുവിനാ(22)യി പൊലിസ് അന്വേഷണം ഊര്‍ജിതമാക്കി.
വിദ്യാര്‍ഥിനിയുടെ അടിവയറ്റിലാണ് ആഴത്തില്‍ കുത്തേറ്റത്. വീടിന്റെ ടെറസിലൂടെ അകത്തു കടന്ന അനന്തു പെണ്‍കുട്ടിയുടെ മുറിയില്‍ക്കയറി കുത്തിപ്പരുക്കേല്‍പ്പിക്കുകയായിരുന്നു. നിലവിളികേട്ട് മാതാപിതാക്കള്‍ ഓടി എത്തുമ്പോഴേക്കും പ്രതി രക്ഷപ്പെട്ടിരുന്നു.

രക്തത്തില്‍ കുളിച്ചു കിടന്ന പെണ്‍കുട്ടിയെ ഉടന്‍ തന്നെ ശാസ്താംകോട്ടയിലെ സ്വകാര്യ ആശുപത്രിയിലും തുടര്‍ന്ന് തിരുവനന്തപുരം മെഡിക്കല്‍ കോളജ് ആശുപത്രിയിലും പ്രവേശിപ്പിക്കുകയായിരുന്നു. ഏറെ നാളായി പെണ്‍കുട്ടിയും അനന്തുവും തമ്മില്‍ പ്രണയത്തിലായിരുന്നുവെന്ന് പറയപ്പെടുന്നു. ഇതിനിടെ പെണ്‍കുട്ടി അനന്തുവുമായി അകന്നതിനെ തുടര്‍ന്നുള്ള പകയാണ് ആക്രമണത്തിന് പിന്നിലെന്നാണ് അറിയുന്നത്.