ജീവനക്കാരുടെ സമയോചിത
ഇടപെടല്‍ ദുരന്തം ഒഴിവാക്കി
തളിപ്പറമ്പ്: പരിയാരം മെഡിക്കല്‍ കോളജ് ഹോസ്റ്റല്‍ തീ         പിടിത്തത്തില്‍ ജീവനക്കാരുടെ സമയോചിതമായ ഇടപെടലിനെത്തുടര്‍ന്ന് ഒഴിവായത് വന്‍ ദുരന്തം. ഫ്രിഡ്ജില്‍ നിന്നുള്ള ഷോര്‍ട്ട് സര്‍ക്യൂട്ടില്‍ നിന്നു പടര്‍ന്ന തീയില്‍ രണ്ട് ഗ്യാസ് സിലിണ്ടറുകള്‍ പൊട്ടിത്തെറിച്ചതോടെ മെസ് ഹാള്‍ പൂര്‍ണമായും തകര്‍ന്നു. സെക്യൂരിറ്റി ജീവനക്കാരന്‍ മനോഹരന്റ നേതൃത്വത്തിലാണ് നൂറോളം വിദ്യാര്‍ഥികളെ മുഴുവന്‍ വിളിച്ചുണര്‍ത്തി പുറത്തെത്തിച്ചത്.
തിരുവനന്തപുരത്ത് കഴിഞ്ഞ ദിവസം ഫ്രിഡ്ജില്‍ നിന്ന് വിഷവാതകം ശ്വസിച്ച് ഒരു കുടുംബത്തിലെ മൂന്ന് പേര്‍ മരിക്കാനിടയായ സാഹചര്യത്തില്‍ പരിയാരം ഹോസ്റ്റലിലെ ഫ്രിഡ്ജ് വച്ച മുറിയില്‍ കിടക്കാറുണ്ടായിരുന്ന ജീവനക്കാരികളെ മറ്റൊരു മുറിയിലേക്ക് മാറ്റിയതും രക്ഷയായി. ബി.ഡി.എസ്, ബി.ഫാം, നഴ്‌സിങ് വിദ്യാര്‍ഥിനികളാണ് ഇവിടെ താമസിക്കുന്നത്. രണ്ട് ഗ്യാസ് സിലിണ്ടര്‍ പൊട്ടിത്തെറിച്ചതാണ് അപകടത്തിന്റെ വ്യാപ്തി കൂട്ടിയത്.
ഹാള്‍ പൂര്‍ണമായി തകര്‍ന്ന് ഉപയോഗശൂന്യമായ നിലയിലായി. അപകടത്തിനിടയായ സാഹചര്യം വ്യക്തമാകുന്നതിനായി വിശദമായ അന്വേഷണം നടത്താനാണ് അധികൃതരുടെ തീരുമാനം. തീപിടിത്തത്തില്‍ 40 ലക്ഷത്തോളം രൂപയുടെ നഷ്ടമുണ്ടായതായി പരിയാരം മെഡിക്കല്‍ കോളജ് എം.ഡി പൊലിസില്‍ നല്‍കിയ പരാതിയില്‍ പറയുന്നു.