തെഹ്‌റാന്‍: ഇസ്‌റാഈലില്‍ കഴിഞ്ഞ ദിവസം ഇറാന്‍ നടത്തിയത് യുക്തിപരമായതും ശരിയായതും നിയമപരവുമായ ആക്രമണമെന്നും തങ്ങളുടെ പ്രതിരോധമാണെന്നും ഇറാന്‍ പരമോന്നത നേതാവ് ആയത്തുല്ല അലി ഖാംനഇ. 2020നു ശേഷം പൊതുജനങ്ങളെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം.

ജുമുഅ നിസ്‌കാരത്തിനു നേതൃത്വം നല്‍കിയ ഖാംനഇ തുടര്‍ന്നാണ് ആയിരങ്ങളെ അഭിസംബോധന ചെയ്തത്. ഇസ്‌റാഈലിനു നല്‍കിയത് ചെറിയ ശിക്ഷമാത്രമാണെന്ന് ഖാംനഇ പറഞ്ഞു. ഇസ്‌റാഈല്‍ ചെയ്യുന്ന കുറ്റകൃത്യം ആശ്ചര്യപ്പെടുത്തുന്നതാണ്.

പേര്‍ഷ്യന്‍ ഭാഷയ്ക്കു പകരം കൂടുതലും അറബി ഭാഷയാണ് ഖാംനഇ പ്രസംഗത്തില്‍ ഉപയോഗിച്ചത്. ഫലസ്തീനും ലബനാനും അദ്ദേഹം പിന്തുണ പ്രഖ്യാപിച്ചു. മേഖലയുടെയും ഇസ്ലാമിക ലോകത്തിന്റെയും സംരക്ഷണത്തിനു ഇസ്ലാമിക രാജ്യങ്ങള്‍ സഹകരിക്കണം. ഇറാന്റെ സഖ്യകക്ഷികള്‍ ഇസ്‌റാഈലിനു നേരെയുള്ള ആക്രമണം തുടരും. നേതാക്കള്‍ കൊല്ലപ്പെട്ടാലും അവര്‍ പിന്നോട്ടുപോകില്ല. കൊല്ലപ്പെട്ട നസ്‌റുല്ലയ്ക്കു വേണ്ടിയും അദ്ദേഹം പ്രാര്‍ഥന നടത്തി.

നസ്‌റുല്ലയുടെ പാത പ്രചോദനമാണെന്ന് ഖാംനഇ പറഞ്ഞു. അറബ് മേഖലയിലെ ഭൂമിയുടെയും വിഭവങ്ങളുടെയും നിയന്ത്രണം കൈക്കലാക്കാനുള്ള അമേരിക്കയുടെ ഉപകരണം മാത്രമാണ് ഇസ്‌റാഈല്‍. സയണിസ്റ്റ് അസ്തിത്വം ഭൂമിയില്‍നിന്ന് പിഴുതുമാറ്റപ്പെടും. അവര്‍ക്കു വേരുകളില്ല. അസ്ഥിരമാണ്. യു.എസ് പിന്തുണ മാത്രമാണ് അവരെ നിലനിര്‍ത്തുന്നതെന്നും ഖാംനഇ പറഞ്ഞു.

Iran's Supreme Leader Ali Khamenei claims recent actions against Israel are justified defense. He emphasizes solidarity with Palestine and Lebanon, rejecting U.S. influence and advocating for Islamic unity against Zionism.