പൊന്നാനി:  മണല്‍ കടത്തിന് പുതിയ മാര്‍ഗങ്ങള്‍ തേടിയ മണല്‍ മാഫിയയെ പൊലിസ് വലയിലാക്കി. മണലെടുപ്പിന്  കര്‍ശന നിയന്ത്രണം നിലനില്‍ക്കെ മണല്‍ കടത്തിന് പുതിയ മാര്‍ഗങ്ങള്‍ തേടുകയാണ് മണല്‍ മാഫിയ  സംഘങ്ങള്‍. നേരത്തെ മണലെടുപ്പിന് നിയന്ത്രണങ്ങള്‍ ഏര്‍പ്പെടുത്തിയപ്പോള്‍ ലോറിക്കു പകരം മറ്റു  വാഹനങ്ങളിലാണ് മണല്‍ കടത്തിയിരുന്നത്. ഇതിനെതിരേ നടപടികള്‍ ശക്തമായപ്പോള്‍ മണല്‍ കടത്തിന് ഒരു  പരിധി വരെ കുറവ് വന്നെങ്കിലും ഇപ്പോള്‍ വീണ്ടും മണല്‍ മാഫിയാ സംഘങ്ങള്‍ തലപൊക്കുകയാണ്.  ലോറിയില്‍ മണല്‍ നിറച്ച് അതിനു മുകളില്‍ ക്വാറി വേസ്റ്റ് നിറച്ച് പോകുന്നതാണ് പുതിയ രീതി.  ഇത്തരത്തില്‍ മണല്‍ നിറച്ച് പോകുന്ന ലോറിയാണ് പൊന്നാനി എസ് ഐ.കെ.വാസുവും സംഘവും  ചേര്‍ന്ന് പിടികൂടിയത്. ലോറി പൊലിസ് കസ്റ്റഡിയിലെടുത്തു.