സിയൂള്‍: ഫിഫ അണ്ടര്‍ 20 ലോകകപ്പ് പോരാട്ടങ്ങളില്‍ ഫ്രാന്‍സിന് തകര്‍പ്പന്‍ ജയം. മറുപടിയില്ലാത്ത മൂന്ന് ഗോളുകള്‍ അവര്‍ ഹോണ്ടുറാസിനെ തുരത്തി.
മറ്റൊരു മത്സരത്തില്‍ സെനഗല്‍ എതിരില്ലാത്ത രണ്ട് ഗോളുകള്‍ക്ക് ഏഷ്യന്‍ കരുത്തരായ സഊദി അറേബ്യയെ വീഴ്ത്തി. ഇക്വഡോര്‍- അമേരിക്ക പോരാട്ടം 3-3ന് തുല്ല്യത പാലിച്ചപ്പോള്‍ വിയറ്റ്‌നാം- ന്യൂസിലന്‍ഡ് പോരാട്ടം ഗോള്‍രഹിത സമനില. ആദ്യ പകുതിയില്‍ രണ്ടും രണ്ടാം പകുതിയില്‍ ഒരു ഗോളും തികച്ചാണ് ഫ്രാന്‍സ് ആദ്യ പോരാട്ടത്തില്‍ തന്നെ മികച്ച വിജയം കുറിച്ചത്. അഗസ്റ്റിന്‍, ഹരിത്, ടെറിയര്‍ എന്നിവര്‍ ഫ്രഞ്ച് ടീമിനായി വല ചലിപ്പിച്ചു.
കളിയുടെ അഞ്ച്, ഏഴ് മിനുട്ടുകളില്‍ ഗോള്‍ നേടി അമേരിക്കയെ ഞെട്ടിച്ച് തുടങ്ങിയ ഇക്വഡോറിനെ മികച്ച പോരാട്ടത്തിലൂടെ യു.എസ്.എ 3-3ന് സമനിലയില്‍ പിടിക്കുകയായിരുന്നു. 36, 54 മിനുട്ടുകളില്‍ സര്‍ജന്റ് നേടിയ ഇരട്ട ഗോള്‍ അമേരിക്കക്ക് സമനില സമ്മാനിച്ചു. എന്നാല്‍ 64ാം മിനുട്ടില്‍ തന്റെ രണ്ടാം ഗോളിലൂടെ സബെസാസ് ഇക്വഡോറിന്റെ ലീഡ് വീണ്ടും ഉയര്‍ത്തി. മത്സരം ഇക്വഡോര്‍ സ്വന്തമാക്കുമെന്ന് തോന്നലുണര്‍ത്തിയെങ്കിലും അവസാന വിസിലിന് തൊട്ട് മുന്‍പ് ഡെ ല ടോറെ അമേരിക്കയെ സമനിലയില്‍ എത്തിച്ചു.