പട്‌ന: പാര്‍ട്ടിവിട്ടവര്‍ക്കെതിരേ പരസ്യഭീഷണയുമായി മുതിര്‍ന്ന ബി.ജെ.പി നേതാവും ബിഹാര്‍ മുന്‍ ഉപമുഖ്യമന്ത്രിയുമായ സുശീല്‍കുമാര്‍ മോദി. ബി.ജെ.പി ഒരു 'വണ്‍വേ ട്രാഫിക്ക്' സംവിധാനമാണെന്നും പാര്‍ട്ടിയില്‍ ചേര്‍ന്നവര്‍ക്ക് പിന്നീട് പുറത്തുപോവാന്‍ കഴിയില്ലെന്നും സുശീല്‍കുമാര്‍ മോദി പറഞ്ഞു. ഞങ്ങളുടെ പാര്‍ട്ടി വണ്‍വേ ട്രാഫിക്ക് പോലെയാണ്. നിങ്ങള്‍ക്ക് ഇവിടേക്ക് വരാം. പക്ഷേ ഇവിടെനിന്ന് പോകാനാകില്ല. അങ്ങിനെ പാര്‍ട്ടി വിടുന്നവര്‍ക്ക് സമാധാനത്തോടെ ജീവിക്കാന്‍ കഴിയില്ലെന്നും അദ്ദേഹം പറഞ്ഞു. ബിഹാര്‍ സര്‍ക്കാരില്‍ ഇല്ലെങ്കിലും തന്റെ ആത്മാവ് നിലവിലെ സര്‍ക്കാരിനൊപ്പം ഉണ്ടെന്നും അദ്ദേഹം പറഞ്ഞു. വാര്‍ത്ത ഏജന്‍സി എ.എന്‍.ഐയാണ് സുശീല്‍കുമാര്‍ മോദിയുടെ ഭീഷണിപ്രസംഗം റിപ്പോര്‍ട്ട്‌ചെയ്തത്.
എല്‍.ജെ.പി നേതാവും മുന്‍ കേന്ദ്രമന്ത്രിയുമായ രാംവിലാസ് പാസ്വാന്റെ നിര്യാണത്തെത്തുടര്‍ന്ന് ബിഹാറില്‍ ഒഴിവുവന്ന രാജ്യസഭാ സീറ്റിലേക്കുള്ള സ്ഥാനാര്‍ഥിയായി സുശീല്‍കുമാറിനെ ബി.ജെ.പി പ്രഖ്യാപിച്ചതിന് പിന്നാലെയാണ് അദ്ദേഹത്തിന്റെ ഭീഷണിപ്രസംഗവും പുറത്തുവന്നിരിക്കുന്നത്. ഈ മാസം 14നാണ് രാജ്യസഭാ ഉപതിരഞ്ഞെടുപ്പ്.