തിരുവനന്തപുരം: ആവേശം നല്ലതാണ്, എന്നാല്‍ അമിതാവേശം വിഷമായി മാറുമെന്നു കോണ്‍ഗ്രസ് പ്രവര്‍ത്തക സമിതി അംഗം എ.കെ ആന്റണി. കെ.പി.സി.സി അധ്യക്ഷന്റെയും സഹ ഭാരവാഹികളുടെയും സ്ഥാനാരോഹണ ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ഒറ്റയ്‌ക്കോടിയാല്‍ വിജയിക്കില്ല. കൂടെ ഓടാന്‍ ആളുവേണം. ടീം വര്‍ക്കിലൂടെ മാത്രമേ വിജയം കണ്ടെത്താനാകൂവെന്നും അദ്ദേഹം പറഞ്ഞു. ചെങ്ങന്നൂരിലെ പരാജയത്തില്‍നിന്നു പാഠം പഠിച്ചുവേണം പ്രവര്‍ത്തനം തുടങ്ങേണ്ടത്. പരമ്പരാഗത കോണ്‍ഗ്രസ് കുടുംബങ്ങളും കോണ്‍ഗ്രസുകാരും സാമുദായിക വിഭാഗങ്ങളും പഴയതുപോലെ വോട്ട് ചെയ്തില്ലെന്നതാണ് ചെങ്ങന്നൂരില്‍ പരാജയത്തിനിടയാക്കിയത്.
അതിന്റെ കാരണം തിരിച്ചറിഞ്ഞു പ്രവര്‍ത്തിക്കണം. ന്യൂജനറേഷനെ ആകര്‍ഷിക്കാന്‍ കഴിയണം. ബൂത്തുതലം മുതല്‍ മികവാര്‍ന്ന തെരഞ്ഞെടുപ്പ് മാനേജ്‌മെന്റ് നടപ്പാക്കണമെന്നും അദ്ദേഹം പറഞ്ഞു.
മോദി സര്‍ക്കാരിനെ താഴെയിറക്കാന്‍ എം.പിമാരുടെ എണ്ണം വര്‍ധിപ്പിക്കണം. കെ.പി.സി.സി അധ്യക്ഷന്റെ ഇതുപോലൊരു സ്ഥാനാരോഹണം തന്റെ ഓര്‍മയിലില്ലെന്നു പറഞ്ഞ അദ്ദേഹം, ഇതുപോലെ അധികാരം കൈമാറിയിട്ടുമില്ലെന്നും കൂട്ടിച്ചേര്‍ത്തു. ആരും പ്രതീക്ഷിക്കാത്ത അസാധാരണ തീരുമാനമാണ് രാഹുല്‍ഗാന്ധി എടുത്തത്.
മുല്ലപ്പള്ളിയെ സമൂഹവും കോണ്‍ഗ്രസ് പ്രവര്‍ത്തകരും സ്വീകരിച്ചുകഴിഞ്ഞു. ഒന്നിച്ചുനിന്നാല്‍ ആര്‍ക്കും കോണ്‍ഗ്രസിനെ തകര്‍ക്കാന്‍ സാധ്യമല്ല. എല്ലാവരുടെയും സേവനം പ്രയോജനപ്പെടുത്തണം. പുനഃസംഘടന പൂര്‍ത്തിയാകുമ്പോള്‍ എല്ലാവര്‍ക്കും അവസരമുണ്ടാകും. ഐക്യമാണ് പാര്‍ട്ടിയെ ജയിപ്പിക്കുകയെന്നും അടിച്ചേല്‍പ്പിക്കുന്ന ഐക്യം ഫലം ചെയ്യില്ലെന്നും ആന്റണി പറഞ്ഞു.