ലണ്ടന്‍: ഇംഗ്ലീഷ് പ്രീമിയര്‍ ലീഗിലെ ഏറ്റവും മികച്ച പരിശീലകനുള്ള ലീഗ് മാനേജേഴ്‌സ് അസോസിയേഷന്‍(എല്‍.എം.എ) പുരസ്‌കാരം ചെല്‍സിയുടെ പരിശീലകന്‍ അന്റോണിയോ കോണ്ടെയ്ക്ക്. സീസണില്‍ ചെല്‍സിയെ കിരീടത്തിലേക്ക് നയിച്ചതാണ് കോണ്ടെയെ പുരസ്‌കാരത്തിനര്‍ഹനാക്കിയത്.
യൂറോ കപ്പിന് ശേഷം ഇറ്റാലിയന്‍ ടീമിന്റെ സ്ഥാനമൊഴിഞ്ഞ കോണ്ടെ ചെല്‍സിയുടെ കോച്ചിങ് സ്ഥാനം ഏറ്റെടുക്കുകയായിരുന്നു. ആദ്യ അവസരത്തില്‍ തന്നെ ടീമിന് കിരീടത്തിലേക്ക് നയിക്കാനും കോണ്ടെയ്ക്ക് സാധിച്ചു. തുടര്‍ച്ചയായ രണ്ടാം തവണയാണ് ഇറ്റാലിയന്‍ പരിശീലകന്‍ നേട്ടം സ്വന്തമാക്കുന്നത്. നേരത്തെ ലെയ്സ്റ്റര്‍ സിറ്റി ചാംപ്യന്‍മാരാക്കിയ ക്ലോഡിയോ റാനിയേരി പുരസ്‌കാരത്തിനര്‍ഹനായിരുന്നു. സീസണില്‍ 38 മത്സരങ്ങളില്‍ നിന്ന് 93 പോയിന്റാണ് ചെല്‍സി സ്വന്തമാക്കിയത്. അഞ്ചു തോല്‍വികള്‍ മാത്രമാണ് ടീം വഴങ്ങിയത്. എഫ്.എ കപ്പിന്റെ ഫൈനലില്‍ ആഴ്‌സണലിനെ വീഴ്ത്താന്‍ സാധിച്ചാല്‍ കോണ്ടെ ഇരട്ടക്കിരീട നേട്ടം സ്വന്തമാക്കാം.