കല്‍പ്പറ്റ: സി.പി.എമ്മിലെ ആഭ്യന്തര സംഘര്‍ഷം സര്‍ക്കാരിന്റെ കൂട്ടുത്തരവാദിത്തം ഇല്ലാതാക്കിയെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ പറഞ്ഞു.
സി.പി.എമ്മിനുള്ളില്‍ ഒരുകാലത്തുമില്ലാത്ത വിധത്തിലുള്ള പടലപ്പിണക്കങ്ങളും വഴക്കുമാണ് നടക്കുന്നത്. പാര്‍ട്ടിയുടെ പ്രവര്‍ത്തികളെ ന്യായീകരിക്കുന്നതിനാണ് കൊവിഡുമായി ബന്ധപ്പെട്ട വാര്‍ത്താസമ്മേളനത്തില്‍ മുഖ്യമന്ത്രി കൂടുതല്‍ സമയമെടുക്കുന്നതെന്നും അദ്ദേഹം പറഞ്ഞു. കല്‍പ്പറ്റയില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. കെ.എസ്.എഫ്.ഇയിലെ അഴിമതിയുമായി ബന്ധപ്പെട്ട് സംസ്ഥാനത്ത് നടക്കുന്നത് മുഖ്യമന്ത്രിയും ധനമന്ത്രിയും തമ്മിലുള്ള തെരുവുയുദ്ധമാണ്. കെ.എസ്.എഫ്.ഇയില്‍ നടന്ന അന്വേഷണവുമായി ബന്ധപ്പെട്ട റിപ്പോര്‍ട്ട് സമൂഹമധ്യത്തില്‍ വയ്ക്കാന്‍ സര്‍ക്കാര്‍ തയാറാകണം.
ധനമന്ത്രിക്ക് നേരിട്ടുചുമതലയുള്ള കെ.എസ്.എഫ്.ഇയിലാണ് റെയ്ഡ് നടന്നത്. അഴിമതി നടന്നെന്ന് മുഖ്യമന്ത്രി തന്നെ സമ്മതിച്ചിരിക്കുകയാണ്. അഴിമതി സംബന്ധിച്ച് സമഗ്രമായ അന്വേഷണം വേണമെന്നും ഗൂഢാലോചന പുറത്തുവരണമെന്നും അദ്ദേഹം ആവശ്യപ്പെട്ടു.