നെടുമ്പാശ്ശേരി: ഐക്യരാഷ്ട്രസഭയുടെ പരമോന്നത പരിസ്ഥിതി പുരസ്‌കാരമായ 'ചാംപ്യന്‍ ഓഫ് എര്‍ത്ത് 'സിയാലിന് സമ്മാനിച്ചു. ഐക്യരാഷ്ട്ര സഭയുടെ 73-ാം പൊതുസമ്മേളനത്തിന്റെ ഭാഗമായി ന്യൂയോര്‍ക്കില്‍ നടന്ന ചടങ്ങില്‍ യു.എന്‍.ഇ.പി അസിസ്റ്റന്റ് സെക്രട്ടറി സത്യപാല്‍ ത്രിപാഠിയില്‍നിന്ന് സിയാല്‍ മാനേജിങ് ഡയരക്ടര്‍ വി.ജെ കുര്യന്‍ പുരസ്‌കാരം ഏറ്റുവാങ്ങി. മികച്ച 'സംരംഭക ആശയം' എന്ന വിഭാഗത്തിലാണ് സിയാലിനെ ഐക്യരാഷ്ട്രസഭ അംഗീകരിച്ചത്.
ലോകത്തിലെ ആദ്യത്തെ സമ്പൂര്‍ണ സൗരോര്‍ജ വിമാനത്താവളം എന്ന ആശയം വിജയകരമായി പ്രാവര്‍ത്തികമാക്കിയതാണ് സിയാലിനെ ഇത്തവണ പുരസ്‌കാരത്തിന് അര്‍ഹമാക്കിയത്. പരിസ്ഥിതി സൗഹാര്‍ദ ഊര്‍ജ സ്രോതസുകളെ ഉപയോഗിക്കുന്നതില്‍ നേതൃപരമായ പങ്കാണ് സിയാല്‍ വഹിക്കുന്നതെന്ന് യു.എന്‍.ഇ.പിയുടെ ഔദ്യോഗിക പത്രക്കുറിപ്പ് വ്യക്തമാക്കി. പ്രതിസന്ധി ഘട്ടത്തില്‍ മുന്നില്‍ നിന്ന് നയിച്ച മുഖ്യമന്ത്രി പിണറായി വിജയന് ഈ പുരസ്‌കാരം സമര്‍പ്പിക്കുന്നുവെന്ന് പുരസ്‌കാരം സ്വീകരിച്ചു കൊണ്ടുള്ള മറുപടി പ്രസംഗത്തില്‍ വി.ജെ.കുര്യന്‍ പറഞ്ഞു.