കേന്ദ്രം അനുവദിച്ചാല്‍ വരുന്ന നിയമസഭാ തെരഞ്ഞെടുപ്പില്‍ പ്രവാസികള്‍ക്ക് വോട്ടു ചെയ്യാം 

ന്യൂഡല്‍ഹി: പ്രവാസികള്‍ക്കും പോസ്റ്റല്‍ വോട്ട് അനുവദിക്കാന്‍ തങ്ങള്‍ തയാറെടുത്തതായി തെരഞ്ഞെടുപ്പ് കമ്മിഷന്‍ കേന്ദ്ര നിയമന്ത്രാലയത്തെ അറിയിച്ചു. 

ഇതിനായി സാങ്കേതികവും ഭരണപരവുമായുള്ള തയാറെടുപ്പുകള്‍ പൂര്‍ത്തിയാക്കി. 

അടുത്ത വര്‍ഷം നടക്കാനിക്കുന്ന കേരളം, അസം, പശ്ചിമബംഗാള്‍, തമിഴ്‌നാട്, പുതുച്ചേരി തെരഞ്ഞെടുപ്പുകളില്‍ പ്രവാസികള്‍ക്ക് പോസ്റ്റല്‍ വോട്ട് അനുവദിക്കാമെന്നും തെരഞ്ഞെടുപ്പ് കമ്മിഷന്‍ അറിയിച്ചു. 

പ്രവാസി ഇന്ത്യക്കാര്‍ക്ക് പ്രോക്‌സി വോട്ട് അനുവദിക്കുന്ന ബില്‍ പാര്‍ലമെന്റില്‍ കാലഹരണപ്പെട്ട് ഒരു വര്‍ഷം പിന്നിടുമ്പോഴാണ് പ്രവാസി വോട്ടവകാശ ചര്‍ച്ചകള്‍ തെരഞ്ഞെടുപ്പ് കമ്മിഷന്‍ സജീവമാക്കിയിരിക്കുന്നത്. 

ഇലക്ട്രോണിക്കലി ട്രാന്‍സ്മിറ്റഡ് പോസ്റ്റല്‍ ബാലറ്റ് സംവിധാനത്തിലൂടെ വിദേശ ഇന്ത്യക്കാര്‍ക്ക് വോട്ടു ചെയ്യാമെന്നാണ് കമ്മിഷന്‍ അറിയിക്കുന്നത്. തെരഞ്ഞെടുപ്പ് വിജ്ഞാപനം വന്ന് അഞ്ചു ദിവസത്തിനകം വോട്ട് ചെയ്യേണ്ടവര്‍ റിട്ടേണിങ് ഓഫിസറെ അറിയിക്കുക. 

ഓഫിസര്‍ വിതരണം ചെയ്യുന്ന ഇലക്ട്രോണിക് ബാലറ്റ് പേപ്പറില്‍ വോട്ട് രേഖപ്പെടുത്തി നയതന്ത്ര പ്രതിനിധിയുടെ സാക്ഷ്യപത്രം വാങ്ങുക. ഇതാണ് കമ്മിഷന്‍ കേന്ദ്രത്തിന് സമര്‍പ്പിച്ച രൂപരേഖ. 

നിലവില്‍ പ്രവാസികള്‍ക്ക് നാട്ടിലെത്തി മാത്രമേ വോട്ടുചെയ്യാനാവൂ. 60 ലക്ഷം പ്രവാസികള്‍ക്കെങ്കിലും പുതിയ സൗകര്യം മുഖേന വോട്ടു രേഖപ്പെടുത്താന്‍ കഴിയുമെന്നാണ് തെരഞ്ഞെടുപ്പ് കമ്മിഷന്റെ ഏകദേശ കണക്ക്.