പാണ്ടിക്കാട്: പകര്‍ച്ചപ്പനി റിപ്പോര്‍ട്ട് ചെയ്ത കുളപ്പറമ്പിലെ പൊലിസ് ട്രെയ്‌നിങ് ക്യാംപില്‍ ആരോഗ്യ വകുപ്പ് അധികൃതര്‍ സന്ദര്‍ശിച്ചു. പാണ്ടിക്കാട് പി.എച്ച്.സി ഹെല്‍ത്ത് ഇന്‍സ്‌പെക്ടര്‍ സി. മൊയ്തീന്‍കുട്ടി, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ സി.വി ബിശ്വജിത്ത്, കെ.എം ഷിജി, പൊലിസ് ഡിസ്‌പെന്‍സറിയിയിലെ മെഡിക്കല്‍ ഓഫീസര്‍ ഡോ. സക്കീര്‍ ഹുസൈന്‍, ജെ.പി.എച്ച്.എന്‍ ആയിഷ എന്നിവരുടെ നേതൃത്വത്തിലുള്ള സംഘമാണ് സന്ദര്‍ശനം  നടത്തിയത്.
ആര്‍.ആര്‍.ആര്‍.എഫിലെ 96ല്‍ 83പേര്‍ക്ക് വൈറല്‍ പനി ബാധിച്ചതിനാല്‍ വിശ്രമത്തിനായി അവധി  നല്‍കി. ഐ.ആര്‍.ബിയിലെ 86 ട്രെയ്‌നികളില്‍ 25 പേര്‍ക്ക് പനി ബാധിച്ചതായി കണ്ടെത്തി. ഇതില്‍ ഒരാള്‍ക്ക് ടൈഫോയിഡ് ഉള്ളതായും സംശയിക്കുന്നു.
ഇദ്ദേഹം ഒരാഴ്ച മുന്‍പ് നാട്ടില്‍ പോയിരുന്നു. അവിടെ നിന്നാണ് രോഗബാധ ഏറ്റെതെന്നാണ് ആരോഗ്യ വകുപ്പിന്റെ അന്വേഷണത്തില്‍ അറിയാന്‍ സാധിച്ചത്. ഐ.ആര്‍.ബിയിലെ മുഴുവന്‍ ട്രെയ്‌നികള്‍ക്കും അസിസ്റ്റന്റ് കമാന്‍ഡന്റ് ടി.സന്തോഷ്, ബറ്റാലിയന്‍  സി.ഐ  മനോജ്, ഡി.കമ്പനിയിലെ രാമചന്ദ്രന്‍ എന്നിവരുടെ സാന്നിധ്യത്തില്‍ ഹെല്‍ത്ത്  ഇന്‍സ്‌പെക്ടര്‍ ബോധവത്കരണ ക്ലാസെടുത്തു.