മാനന്തവാടി: മാനന്തവാടിയിലെ യുവവ്യാപാരിയെയും സുഹൃത്തുക്കളെയും സ്ത്രീകളടങ്ങുന്ന സംഘം തട്ടിക്കൊണ്ടുപോയി മൈസൂര്‍, മാനസിനഗറില്‍ വീട്ടുതടങ്കലിലാക്കി 20 ലക്ഷം രൂപ മോചന ദ്രവ്യമായി ആവശ്യപ്പെട്ട് ദേഹോപദ്രവം ഏല്‍പ്പിച്ച് സംഭവത്തിലെ പ്രധാന പ്രതിയെ മാനന്തവാടി പൊലിസ് ഇന്‍സ്‌പെക്ടര്‍ പി.കെ മണിയും സംഘവും അറസ്റ്റ് ചെയ്തു.
കര്‍ണ്ണാടക കുശാല്‍നഗര്‍ ഗോണ്ടിബസവനള്ളി സ്വദേശിയായ നസീര്‍ എന്ന നൗഷാദിനെയാണ് പൊലിസ് വലയിലാക്കിയത്.
തിരുവനന്തപുരത്തുള്ള പ്രമുഖ വ്യവസായിയെ കുടുക്കാനുള്ള തന്ത്രങ്ങള്‍ മെനയുന്നതിനിടെയാണ് നൗഷാദ് പൊലിസൊരുക്കിയ ട്രാപ്പില്‍പെടുന്നത്.
വ്യാപാരികളെയും മറ്റ് സമൂഹത്തിലെ പ്രമുഖരെയും സ്ത്രീകളെ ഉപയോഗിച്ച് ഫോണിലൂടെ പ്രലോഭിപ്പിച്ച് റിസോര്‍ട്ടുകളിലും, ഹോട്ടലുകളിലും മറ്റുമെത്തിച്ച ശേഷം അവരുടെ സ്വകാര്യ ദൃശ്യങ്ങള്‍ കാമറയില്‍ പകര്‍ത്തി വിലപേശി ലക്ഷങ്ങള്‍ തട്ടുന്ന സംഘത്തിലെ പ്രാധന കണ്ണിയാണ് ഇപ്പോള്‍ പിടിയിലായ നൗഷാദ്.
ഏഴോളം പേര്‍ക്കെതിരേയായിരുന്നു സംഭവത്തില്‍ കേസെടുത്തിരുന്നത്.
സംഘത്തിലെ പ്രധാനകണ്ണിയായ നൗഷാദ് പൊലിസിനെ വെട്ടിച്ച് ബംഗളൂരുവില്‍ താമസിച്ച് വരികയായിരുന്നു. നൗഷാദിനെ പ്രലോഭിപ്പിച്ച് മാനന്തവാടിയിലെത്തിച്ച പൊലിസ് ഒടുവില്‍ പ്രതിയെ വലയിലാക്കുകയായിരുന്നു. നൗഷാദിന് കര്‍ണ്ണാടകയില്‍ പല സ്റ്റേഷനുകളിലും സമാനരീതിയിലുള്ള കേസുകള്‍ നിലവിലുള്ളതായി അന്വേഷണത്തില്‍ കണ്ടെത്തിയതായി എസ്.ഐ പി.കെ മണി പറഞ്ഞു. പ്രതിയെ ഇന്ന് കോടതിയില്‍ ഹാജരാക്കും.