കൊല്ലം: ഗള്‍ഫ് രാജ്യങ്ങളില്‍ നിന്നും ഇന്ത്യാക്കാരുടെ മൃതദേഹം സൗജന്യമായി നാട്ടിലെത്തിക്കുന്നതിനുള്ള സംവിധാനം ഏര്‍പ്പെടുത്തണമെന്നും എയര്‍ ഇന്ത്യ മൃതശരീരം ഇന്ത്യയിലെത്തിക്കുന്നതിന് ചാര്‍ജ്ജ് വര്‍ധിപ്പിച്ച നടപടി പിന്‍വലിക്കണമെന്നും ആവശ്യപ്പെട്ട് എന്‍.കെ പ്രേമചന്ദ്രന്‍ എം.പി കേന്ദ്ര വിദേശകാര്യ മന്ത്രി സുഷമ സ്വരാജിനും കേന്ദ്ര വ്യോമയാന വകുപ്പ് മന്ത്രി സുരേഷ് പ്രഭുവിനും നിവേദനം നല്‍കി. ഗള്‍ഫ് രാജ്യങ്ങളില്‍ നിന്നും ഇന്ത്യയിലേക്ക് മൃതദേഹം കൊണ്ടുവരുന്നതിന് സൗജ്യമായി വിമാന സൗകര്യമേര്‍പ്പെടുത്തണമെന്നുള്ളത് മലയാളികളുള്‍പ്പെടെയുള്ള ഗള്‍ഫ് നാട്ടിലെ പ്രവാസികളുടെ ദീര്‍ഘനാളത്തെ ആവശ്യമാണ്. എന്നാല്‍ സൗജന്യ സംവിധാനം ഏര്‍പ്പെടുത്തുന്നതിനു പകരം നിലവിലെ നിരക്ക് കുത്തനെ കൂട്ടുകയാണ് എയര്‍ ഇന്ത്യ ചെയ്തത്. മൃതശരീരം നാട്ടിലെത്തിക്കുന്നതിന് ഭാരം കണക്കാക്കി ചാര്‍ജ്ജ് നിശ്ചയിക്കുന്ന എയര്‍ ഇന്ത്യയുടെ നിലപാട് മരണപ്പെട്ടവരോടും മൃതശരീരത്തോടുമുള്ള അനാദരവാണ്. ഗള്‍ഫ് നാടുകളില്‍ പണിയെടുക്കുന്ന പ്രവാസികളുടെ സാമ്പത്തിക നിലവാരം പരിഗണിക്കാതെയാണ് എയര്‍ ഇന്ത്യ ചാര്‍ജ്ജ് കുത്തനെ കൂട്ടിയത്. പ്രവാസികളുടെ മൃതദേഹം സൗജന്യമായി നാട്ടിലെത്തിക്കാനുള്ള ഉത്തരവാദിത്വം സര്‍ക്കാര്‍ ഏറ്റെടുക്കണമെന്നും അതിനായി സൗജന്യ വിമാന സൗകര്യം ഏര്‍പ്പെടുത്തണമെന്നും എം.പി ആവശ്യപ്പെട്ടു.