പത്തനംതിട്ട: ശബരിമലയില്‍ സ്ത്രീകള്‍ക്ക് പ്രവേശിക്കാമെന്ന സുപ്രിം കോടതി വിധിക്കെതിരേ പന്തളം കൊട്ടാരം പുനഃപരിശോധന ഹരജി നല്‍കും. ഇക്കാര്യത്തില്‍ കൂടുതല്‍ നിയമോപദേശം തേടും. വിധി പുറപ്പെടുവിച്ച ബെഞ്ചിനെ തന്നെ സമീപിക്കാനും തീരുമാനിച്ചിട്ടുണ്ട്. എന്നാല്‍, ഇതിനു സാധ്യമല്ലെങ്കില്‍ ഭരണഘടന ഫുള്‍ ബെഞ്ചില്‍ ഹരജി നല്‍കുമെന്നും പന്തളം കൊട്ടാരം നിര്‍വാഹക സമിതി സെക്രട്ടറി നാരായണ വര്‍മ അറിയിച്ചു.

ശബരിമലയിലെ വിധിയില്‍ തുടര്‍നടപടികള്‍ ചര്‍ച്ച ചെയ്യാന്‍ കൊട്ടാരത്തില്‍വച്ചു നടന്ന യോഗത്തിലാണ് ഇക്കാര്യത്തില്‍ ധാരണയായത്. ശബരിമലയില്‍ സ്ത്രീ പ്രവേശനം അനുവദിക്കരുതെന്നായിരുന്നു പന്തളം കൊട്ടാരം സുപ്രിം കോടതിയില്‍ വാദിച്ചത്. വിധി മറികടക്കുന്നതിനായി നിയമനിര്‍മാണത്തിന് രാഷ്ട്രപതിയെയും കേന്ദ്രസര്‍ക്കാരിനെയും സമീപിക്കുമെന്നും പന്തളം കൊട്ടാരം നിര്‍വാഹക സമിതി സെക്രട്ടറി അറിയിച്ചു.