വിയന്ന: പാകിസ്താന്‍ കേന്ദ്രമായി പ്രവര്‍ത്തിക്കുന്ന അധോലോക രാജാവ് ദാവൂദ് ഇബ്രാഹിം ഭീകരര്‍ക്ക് ഒത്താശ ചെയ്യുന്നതായി ഇന്ത്യ യു.എന്‍ രക്ഷാസമിതിയില്‍. ദാവൂദിന്റെ ക്രിമിനല്‍ സിന്‍ഡിക്കേറ്റ് ഭീകര ശൃംഖലയായി മാറിയിരിക്കുകയാണ്. ഡി-കമ്പനിയും ലഷ്‌കറെ ത്വയിബയും ജെയ്‌ഷെ മുഹമ്മദും ഉയര്‍ത്തുന്ന യഥാര്‍ഥ ഭീഷണിയിലേക്ക് യു.എന്നിലെ ഇന്ത്യന്‍ അംബാസിഡര്‍ സയ്ദ് അക്ബറുദ്ദീന്‍ രക്ഷാസമിതിയുടെ ശ്രദ്ധ ക്ഷണിച്ചു.

ധനസമ്പാദനത്തിനായി ഭീകരസംഘടനകള്‍ പ്രകൃതിവിഭവ കയറ്റുമതിയും മനുഷ്യക്കടത്തും ഉപയോഗപ്പെടുത്തുന്നു. കള്ളനോട്ട്, ആയുധ ഇടപാട്, മയക്കുമരുന്ന് കടത്ത് എന്നിവ വഴിയും ഭീകരര്‍ പണം സ്വരൂപിക്കുന്നതായും ഇതു തടയാന്‍ നടപടിയെടുക്കണമെന്നും അക്ബറുദ്ദീന്‍ രക്ഷാസമിതിയോട് ആവശ്യപ്പെട്ടു.