കൊടുങ്ങല്ലൂര്‍: ഡ്രൈവര്‍ക്ക് ദേഹാസ്വാസ്ഥ്യം അനുഭവപ്പെട്ടതിനെ തുടര്‍ന്ന് നിയന്ത്രണംവിട്ട ലോറിയിടിച്ച് സ്‌കൂട്ടര്‍ യാത്രക്കാരായ മാതാവും മകളും മരിച്ചു.
കൊടുങ്ങല്ലൂര്‍ തെക്കെ നട കറപ്പംവീട്ടില്‍ ഹുസൈന്റെ ഭാര്യ നദീറ(69), മകള്‍ നിഷ (39) എന്നിവരാണ് മരിച്ചത്. ദേശീയപാതയില്‍ ശ്രീനാരായണപുരത്തിന് സമീപം ആല വാസുദേവ വിലാസം വളവില്‍ ഇന്നലെ രാവിലെ 11 മണിയോടെയായിരുന്നു അപകടം.
ചരക്കിറക്കി മടങ്ങുകയായിരുന്ന മീന്‍ ലോറിയുടെ ഡ്രൈവര്‍ക്ക് ദേഹാസ്വാസ്ഥ്യം അനുഭവപ്പെട്ടതിനെ തുടര്‍ന്ന് നിയന്ത്രണംവിട്ട ലോറി ഒരു കാറിലും സ്‌കൂട്ടറിലും ഇടിച്ച ശേഷം മതില്‍ തകര്‍ത്ത് നില്‍ക്കുകയായിരുന്നു. അപകടത്തില്‍ ഇരുവര്‍ക്കും ഗുരുതരമായി പരുക്കേറ്റിരുന്നു. ആശുപത്രിയിലെത്തിക്കുമ്പോഴേക്കും നദീറ മരിച്ചിരുന്നു. സ്‌കൂട്ടര്‍ ഓടിച്ചിരുന്ന നിഷയും ആശുപത്രിയിലെത്തിച്ച് അല്‍പ സമയത്തിനകം മരണപ്പെട്ടു.
അപകടത്തില്‍ ലോറി ഡ്രൈവര്‍ ഫ്രാന്‍സിസി(60)ന് പരുക്കേറ്റു. എറണാകുളത്തേക്ക് പോകുകയായിരുന്നു ലോറി.
നദീറയുടെ മകന്‍: ഹാരിഷ്. നിഷയുടെ മക്കള്‍: ഫര്‍സീന്‍, ഫൈസി.