റിയാദ്: സഊദിയിലെ റിയാദില്‍ തൊഴില്‍ നിയമ ലംഘനം കണ്ടെത്തിയ ലേബര്‍ ഓഫീസ് ഉദ്യോഗസ്ഥനെ കുത്തി പരുക്കേല്‍പ്പിച്ച സംഭവത്തില്‍ പ്രതികളെ കണ്ടെത്തുന്നതിന് അന്വേഷണം ഊര്‍ജ്ജിതമാക്കി. ബുധനാഴ്ച്ച രാത്രിയോടെയാണ് റിയാദിലെ പ്രമുഖ വാണിജ്യ കേന്ദ്രമായ ബത്ഹയില്‍ തൊഴില്‍ നിയമ ലംഘന പരിശോധനക്കിടെ ലേബര്‍ ഓഫീസ് ഉദ്യോഗസ്ഥനെ നാലു വിദേശികള്‍ ചേര്‍ന്ന് കുത്തിപ്പരുക്കേല്‍പിച്ചത്.

വിദേശികളുടെ ഭാഗത്ത് ലേബര്‍ ഓഫീസ് ഉദ്യോഗസ്ഥന്‍ നിയമ ലംഘനങ്ങള്‍ കണ്ടെത്തിയിരുന്നു. ഇതുമായി ബന്ധപ്പെട്ട നിയമാനുസൃത നടപടികള്‍ പൂര്‍ത്തിയാക്കുന്നതിനിടെ ഉദ്യോഗസ്ഥനെ നിയമ ലംഘകര്‍ സംഘം ചേര്‍ന്ന് ആക്രമിക്കുകയായിരുന്നു.

അന്വേഷണത്തിന്റെ ഭാഗമായി ചിലരെ കസ്റ്റഡിയിലെടുത്തിട്ടുണ്ട്. മറ്റു ചിലര്‍ നിരീക്ഷണത്തിലുമാണ്. പ്രതികള്‍ക്കായി തിരച്ചില്‍ ശക്തമാക്കിയെന്ന് തൊഴില്‍ സാമൂഹ്യ മന്ത്രാലയ വക്താവ് ഖാലിദ് അബാ ഖൈല്‍ പറഞ്ഞു. പ്രതികളെ കണ്ടെത്തുന്നതിന് രഹസ്യ അന്വേഷണവും വ്യാപകമായ റെയ്ഡും നടക്കുന്നുണ്ട്. പൊലിസുമായി സഹകരിച്ച് അക്രമികളെ പിടികൂടാന്‍ നടപടികള്‍ തുടരുകയാണെന്ന് വക്താവ് പറഞ്ഞു.

പുതിയ സംഭവത്തോടെ ബത്ഹ മേഖലയില്‍ പൊലിസും തൊഴില്‍ മന്ത്രാലയവും രഹസ്യമായി അന്വേഷണം നടത്തുന്നുണ്ട്. തൊഴില്‍, സാമൂഹിക വികസന മന്ത്രി എന്‍ജിനീയര്‍ അഹ്മദ് അല്‍റാജ്ഹിയും ഡെപ്യൂട്ടി മന്ത്രി ഡോ.അബ്ദുല്ല അബൂസ്‌നൈനും ഉദ്യോഗസ്ഥനുമായി ബന്ധപ്പെട്ടു വിവരങ്ങള്‍ ശേഖരിച്ചു.