മലപ്പുറം: ജനവിധിക്കിടെ മലപ്പുറം ജില്ലയിലെ ആറ് തദ്ദേശ സ്ഥാപനങ്ങളുടെ അധ്യക്ഷ സംവരണം സംബന്ധിച്ച് ഹൈക്കോടതി ഡിവിഷന്‍ ബെഞ്ചിന്റെ വിധി പരാതിക്കാര്‍ക്ക് തിരിച്ചടിയായി.
മലപ്പുറം ജില്ലാപഞ്ചായത്ത്, കൊണ്ടോട്ടി, മഞ്ചേരി നഗരസഭകള്‍, കുറ്റിപ്പുറം, വണ്ടൂര്‍, പാണ്ടിക്കാട് തുടങ്ങിയവ സംവരണം ചെയ്യപ്പെട്ട തദ്ദേശസ്ഥാപനങ്ങളുടെ അധ്യക്ഷ പദവിക്കെതിരേയാണ് ഹരജി നല്‍കിയിരുന്നത്. തുടര്‍ച്ചയായി മൂന്നാം തവണയും അധ്യക്ഷ പദവികള്‍ സംവരണമായതോടെയാണ് പരാതിക്കാര്‍ ഹൈക്കോടതിയെ സമീപിച്ചത്.
ഇവ പൊതു വിഭാഗത്തിലേക്ക് മാറ്റി നല്‍കാന്‍ ഹൈക്കോടതി സിംഗിള്‍ ബെഞ്ച് ഉത്തരവ് നല്‍കിയിരുന്നു. ഇതിനെതിരെ സര്‍ക്കാരും തെരഞ്ഞെടുപ്പ് കമ്മിഷനും ഡിവിഷന്‍ ബെഞ്ചില്‍ അപ്പീല്‍ നല്‍കി. ഡിവിഷന്‍ ബെഞ്ച് സിംഗിള്‍ ബെഞ്ച് ഉത്തരവ് റദ്ദാക്കി.
നിലവില്‍ സിംഗിള്‍ ബെഞ്ചിന്റെ ഉത്തരവില്‍ ആറ് തദ്ദേശ സ്ഥാപനങ്ങളിലും അധ്യക്ഷന്മാരാകാന്‍ സാധ്യതയുളള സ്ഥാനാര്‍ഥികളെയടക്കം കണ്ടെത്തി മത്സരിപ്പിച്ചിട്ടുണ്ട്. ഇതിനിടെയാണ് വിധി തിരിച്ചടിയായി വന്നത്. എന്നാല്‍ ഈ വിധിക്കെതിരേയും അപ്പീല്‍ നല്‍കുന്നത് സംബന്ധിച്ച് ആലോചിച്ചുവരികയാണ്.