എടപ്പാള്‍: രാത്രിയിലും പകലുമായി എടപ്പാളില്‍ മൂന്നിടത്ത് വാഹനാപകടം, രണ്ട് മരണം, മൂന്ന് പേര്‍ക്ക് പരുക്കേറ്റു.
ഞായറാഴ്ച രാത്രി എട്ടോടെ എടപ്പാള്‍ പൊന്നാനി റോഡില്‍ ബസിന് പുറകില്‍ ബൈക്ക് ഇടിച്ച് കുമരനല്ലൂര്‍ സ്വദേശികളായ രണ്ട് പേര്‍ക്ക് പരുക്കേറ്റതാണ് ആദ്യത്തെ സംഭവം. ഇവരെ തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. തുടര്‍ന്ന് രാത്രി ഒന്‍പതോടെ സംസ്ഥാനപാതയില്‍ എടപ്പാള്‍ കുറ്റിപ്പുറം റോഡില്‍ പെട്രോള്‍ പമ്പിന് സമീപം കെ.എസ്.ആര്‍.ടി.സി ബസും ബൈക്കും കൂട്ടിയിടിച്ച് ഒരാള്‍ മരിച്ചു. കൂടെയുണ്ടായിരുന്ന സുഹൃത്തിന് പരുക്കേറ്റു. തിരൂര്‍ സ്വദേശി അഷ്‌റഫിന്റെ മകന്‍ സുഹൈല്‍(26)ആണ് മരിച്ചത്. പരുക്കേറ്റ സുഹൃത്ത് തിരൂര്‍ പരന്നേക്കാട് സ്വദേശി അനീഷി (24)നെ കോട്ടക്കലിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ രാവിലെ എട്ടോടെ എടപ്പാള്‍ പുള്ളുവന്‍ പടിയില്‍ കാറിടിച്ച് വിദ്യാര്‍ഥി മരിച്ചതാണ് അടുത്ത അപകടം. ചെറുകാടത്ത് മൊയ്തീന്റെ മകന്‍ ജുബൈര്‍ (11) ആണ് മരിച്ചത്. മദ്‌റസ വിട്ട് വീട്ടിലേക്ക് പോകുമ്പോഴാണ് കാറിടിച്ചത്. പരുക്കേറ്റ ജുബൈറിനെ എടപ്പാളിലെ സ്വകാര്യ ആശുപത്രിയിലെത്തിച്ചെങ്കിലും മരിക്കുകയായിരുന്നു.