ചെറുതുരുത്തി: എസ്.കെ.എസ്.എസ്.എഫ് തൃശ്ശൂര്‍ ജില്ലാ വിഖായ ഗ്രാന്റ് സല്യൂട്ട് ഇന്ന് ചെറുതുരുത്തിയില്‍ നടക്കും.
വിഖായയുടെ ആക്ടീവ് വിങില്‍ പുതുതായി പ്രവര്‍ത്തിക്കുന്ന 300 പേര്‍ക്ക് സംസ്ഥാന സമിതി ആസുത്രണം ചെയ്ത പരിശീലനത്തിന്റെ തൃശൂര്‍ ജില്ലയിലെ ഒന്നാം ഘട്ട പരിശീലന ക്യാംപും വിഖായ വളണ്ടിയേഴ്‌സ് മാര്‍ച്ചും പ്രളയബാധിത പ്രദേശങ്ങളില്‍ രക്ഷാ പ്രവര്‍ത്തനം നടത്തുകയും പുനരധിവസ പ്രവര്‍ത്തനങ്ങള്‍ക്ക് നേതൃത്വം നല്‍കുകയും ചെയ്ത വിഖായയുടെ സന്നദ്ധ പ്രവര്‍ത്തകരെ ജില്ലാ തലത്തില്‍ ആദരിക്കുന്നതിനുള്ള സമ്മേളനവും ഉള്‍പ്പെടുന്നതാണ് ഗ്രാന്റ് സല്യൂട്ട്. രാവിലെ 8.30ന് സിറ്റി കമ്യൂനിറ്റി ഹാളില്‍ സമസ്ത ജംഇയ്യത്തുല്‍ ഖുത്തബാഅ് സംസ്ഥാന ട്രഷറര്‍ സുലൈമാന്‍ ദാരിമി ഏലംകുളം ഉദ്ഘാടനം ചെയ്യും. വിഖായ മെഡിറ്റേഷന്‍, ട്രോമാ കെയര്‍, വിഖായ സഹചാരി, സംഘാടനം തുടങ്ങിയ വിഷയങ്ങളില്‍ എസ്.എസ്.എം സീനിയര്‍ ട്രെയിനര്‍ ഷമീം ഫൈസി പാപ്പനായിപ്പാറ, കോഴിക്കോട് മിംസ് ഹോസ്പിറ്റലിലെ ഡോ.അമീന്‍, എസ്.കെ.എസ്.എസ്.എഫ് സംസ്ഥാന സെക്രട്ടറി റഷീദ് ഫൈസി വെള്ളായിക്കോട്, സുപ്രഭാതം സി.ഇ.ഒ മുസ്ഥഫ മാസ്റ്റര്‍ മുണ്ടുപാറ ക്ലാസുകള്‍ നയിക്കും.
വൈകിട്ട് നാലിന് വിഖായ വളണ്ടിയര്‍ മാര്‍ച്ച് നടക്കും. തുടര്‍ന്ന് ചെറുതരുത്തി പൊലിസ് സ്റ്റേഷനു സമീപം സജ്ജമാക്കിയ എസ്.എം.കെ തങ്ങള്‍ നഗറില്‍ നടക്കുന്ന ഗ്രാന്റ് സല്യൂട്ട് സമസ്ത ജില്ലാ പ്രസിഡന്റ് ചെറുവാളൂര്‍ ഹൈദ്രൂസ് മുസ്‌ലിയാര്‍ ഉദ്ഘാടനം ചെയ്യും. സമസ്ത ജില്ലാ ട്രഷറര്‍ പി.ടി കുഞ്ഞു മുഹമ്മദ് മുസ്‌ലിയാര്‍, ഓണമ്പിള്ളി മുഹമ്മദ് ഫൈസി വളണ്ടിയര്‍മാരെ ആദരിക്കും. ബഷീര്‍ ഫൈസി ദേശമംഗലം, അന്‍വര്‍ മുഹിയുദ്ധീന്‍ ഹുദവി സംസാരിക്കും.