കുട്ടനാട്: മാരക ലഹരി ഗുളികകളുമായി വിദ്യാര്‍ഥിയെ കുട്ടനാട് റെയ്ഞ്ച് എക്‌സൈസ് സംഘം പിടികൂടി. പത്തനംതിട്ട ഇലന്തൂര്‍ കോട്ടവാലയില്‍ പുത്തന്‍ പുരയിടത്തില്‍ പ്രവീണ്‍ ബാബു (20)വിനെയാണ് എക്‌സൈസ് ഇന്‍സ്‌പെക്ടര്‍ ഇ.ആര്‍ ഗിരീഷ് കുമാറിന്റെ നേതൃത്വത്തിലുള്ള സംഘം പിടികൂടിയത്.
തിരുനെല്‍വേലിയില്‍ എന്‍ജിനീയറിങ് വിദ്യാര്‍ഥിയായ ഇയാളെ തിങ്കളാഴ്ച രാത്രിയില്‍ ചമ്പക്കുളം സെന്റ് മേരീസ് ബെസലിക്കയ്ക്ക് സമീപമുള്ള ബസ് സ്റ്റാന്‍ഡില്‍ നിന്നാണ് പിടികൂടിയത്. ആറ് സ്ട്രിപ്പുകളില്‍ നിന്നായി നൈട്രസപാം ഇനത്തിലുള്ള 60 ഗുളികകള്‍ പിടിച്ചെടുത്തു. തമിഴ്‌നാട്ടില്‍നിന്ന് 50 രൂപ നിരക്കില്‍ സ്ട്രിപ്പുകള്‍ വാങ്ങി നാട്ടിലെത്തിച്ച് വില്‍പ്പന നടത്തുകയായിരുന്നു. ഡോക്ടറുടെ കുറിപ്പോടെ മാത്രം വില്‍പ്പന നടത്തേണ്ട നൈട്രോസോണ്‍ ബ്രാന്‍ഡില്‍പ്പെട്ട ഗുളികകള്‍ കാന്‍സര്‍ രോഗബാധിതര്‍ക്ക് വേദനസംഹാരിയായി നല്‍കുന്നതാണ്.
എക്‌സൈസ് പ്രിവന്റീവ് ഓഫിസര്‍മാരായ എസ്. അക്ബര്‍, ടി. പ്രസന്നന്‍, ഗ്രേഡ് പി.ഓമാരായ അലക്‌സ്, സജിമോന്‍, സി.ഇ.ഓമാരായ ആന്റണി, അനീഷ്, ചാക്കോച്ചന്‍ എന്നിവരും സംഘത്തിലുണ്ടായിരുന്നു. രാമങ്കരി കോടതിയില്‍ ഹാജരാക്കിയ ഇയാളെ 14 ദിവസത്തേക്ക് റിമാന്‍ഡ് ചെയ്തു.