ലണ്ടന്‍: ഇംഗ്ലീഷ് പ്രീമിയര്‍ ലീഗ് ടീം വാട്‌ഫോര്‍ടിനെ മാര്‍ക്കോ സില്‍വ പരിശീലിപ്പിക്കും. പുതിയ പരിശീലകനായി മുന്‍ ഹള്‍ സിറ്റി കോച്ച് മാര്‍ക്കോ സില്‍വയെ നിയമിച്ചതായി ക്ലബ് ഔദ്യോഗികമായി വെളിപ്പെടുത്തി. ഇറ്റാലിയന്‍ കോച്ച് വാല്‍ടര്‍ മസ്സെരിയുടെ പകരമാണ് സില്‍വയുടെ നിയമനം. ഒളിംപ്യാകോസ് പൈറസിന്റെ പരിശീലക സ്ഥാനത്ത് നിന്നാണ് സീസണ്‍ പകുതിയായപ്പോള്‍ സില്‍വ ഹള്‍ സിറ്റിയുടെ പരിശീലകനായി സ്ഥാനമേറ്റത്.
തുടക്കത്തില്‍ മികച്ച വിജയങ്ങള്‍ സമ്മാനിക്കാന്‍ സില്‍വയുടെ തന്ത്രങ്ങള്‍ ഹള്‍ സിറ്റിയെ സഹായിച്ചെങ്കിലും പിന്നീട് തിരിച്ചടി നേരിടേണ്ടി വന്നു. സീസണ്‍ അവസാനത്തേക്ക് നിരന്തരം തോല്‍വികള്‍ നേരിട്ട് ഹള്‍ സിറ്റി രണ്ടാം ഡിവിഷനിലേക്ക് തരംതാഴ്ത്തപ്പെട്ടു. തരംതാഴല്‍ ഭീഷണിയില്‍ നിന്ന് കഷ്ടിച്ച് രക്ഷപ്പെട്ട വാട്‌ഫോര്‍ഡ് അടുത്ത സീസണില്‍ മികവ് ലക്ഷ്യമിട്ടാണ് 39കാരനായ സില്‍വയെ ക്ലബിന്റെ പ്രധാന പരിശീലകനായി കൊണ്ടുവന്നത്.