വാടാനപ്പള്ളി : പിണറായി വിജയന്‍ നരേന്ദ്രമോദിയെ അനുകരിക്കുകയാണെന്ന് സുധീരന്‍. കോണ്‍ഗ്രസ് തളിക്കുളം മണ്ഡലം നേതൃത്വ ക്യാംപ് കൈതയ്ക്കലില്‍ ഉദ്ഘാടനം ചെയ്യുകയായിരുന്നു അദ്ദേഹം. മാധ്യമ പ്രവര്‍ത്തകരെ ഭയക്കുന്ന ഒരു മുഖ്യമന്ത്രിയാണ് കേരളത്തിന്റേത്.
നരേന്ദ്രമോദിയെ പലകാര്യങ്ങളിലും അനുകരിക്കാന്‍ ശ്രമിക്കുകയാണ് പിണറായിയെന്നും, മോദി മാധ്യമ പ്രവര്‍ത്തകരെ കാണാത്തതുപോലെയാണു പിണറായി വിജയനും മാധ്യമ പ്രവര്‍ത്തകരെ കാണാത്തതെന്നും മോഡി ഉപദേഷ്ടാവിനെ നിയമിക്കുന്നു, അതുപോലെ പിണറായി വിജയനും ഉപദേശ്ടാവിനെ നിയമിക്കുന്നു.
ആദ്യം ജനങ്ങള്‍ പിന്നെ പാര്‍ട്ടി എന്ന ചിന്ത കോണ്‍ഗ്രസ് പ്രവര്‍ത്തകര്‍ക്കുണ്ടായിരിക്കണം. ഗ്രൂപ്പിസവും മറ്റു വിഭാഗിയ പ്രവര്‍ത്തനങ്ങളുമുണ്ടെങ്കില്‍ മൂന്നാംസ്ഥാനമാണ് അതിന് നല്‍കേണ്ടത്. എന്നാല്‍ ഇവ രണ്ടും ഒഴിവാക്കേണ്ടതാണെന്നാണ് തന്റെ അഭിപ്രായം.
ഗാന്ധിയന്‍ ശൈലിയില്‍ ജനങ്ങള്‍ക്കിടയിലേക്ക് ഇറങ്ങിച്ചെന്ന് പ്രവര്‍ത്തിച്ചാല്‍ കോണ്‍ഗ്രസിന് പഴയ പ്രതാപകാലത്തേക്ക് തിരിച്ചെത്താന്‍ കഴിയുമെന്നും ജനങ്ങള്‍ക്കു മുന്‍പില്‍ ബ്യൂറോക്രാറ്റിക് രീതിയിലുള്ള സമീപനം പാര്‍ട്ടിയിലുണ്ടായാല്‍ തകര്‍ച്ചയ്ക്ക് കാരണമായിട്ടുണ്ട്. ദളിത് ആദിവാസി ന്യൂനപക്ഷ സമൂഹത്തിന് വേണ്ടി പോരാടുന്നുവെന്ന് അവകാശപ്പെടുന്ന കമ്മ്യൂണിസ്റ്റ് പാര്‍ട്ടി കേരളത്തില്‍ അവര്‍ക്കെതിരേ അക്രമണം അഴിച്ചു വിടുന്നത് ഞെട്ടിക്കുന്നതാണെന്ന് സുധീരന്‍ പറഞ്ഞു.
 ഡി.സി.സി പ്രസിഡന്റ് പി.എ.മാധവന്‍ അധ്യക്ഷനായി. ഒ.അബ്ദുറഹ്മാന്‍ കുട്ടി, ഡി.സി.സി. വൈസ് പ്രസിഡന്റ് ജോസ് വള്ളൂര്‍, മുന്‍ എം.എല്‍.എടി.എന്‍.പ്രതാപന്‍, അനില്‍പുളിക്കല്‍, കെ.വി.ദാസന്‍ സംസാരിച്ചു.
വിവിധ വാര്‍ഡുകളില്‍ നടപ്പിലാക്കുന്ന ജൈവകൃഷി സമൃദ്ധിയുടെ ഭാഗമായി വിത്തുവിതരണവും സംസ്ഥാനത്താദ്യമായി മുതിര്‍ന്ന അംഗങ്ങള്‍ക്കുള്ള പെന്‍ഷന്‍ വിതരണവും സുധീരന്‍ ഉദ്ഘാടനം ചെയ്തു.