തിരുവനന്തപുരം: ജനുവരിയില്‍ സ്‌കൂള്‍ തുറക്കുമ്പോള്‍ കുട്ടികള്‍ക്കായി പ്രത്യേകം കൊവിഡ് മാനദണ്ഡങ്ങള്‍ പുറപ്പെടുവിക്കാന്‍ ആലോചന. 

കൊവിഡ് പ്രതിസന്ധി മറികടക്കാന്‍ ആരോഗ്യവകുപ്പുമായി സ്‌കൂള്‍ തുറക്കുന്നതിനു മുന്‍പ് ചര്‍ച്ച ചെയ്യുമെന്ന് വിദ്യാഭ്യാസ വകുപ്പ് നേരത്തെ അറിയിച്ചിരുന്നു. സാമൂഹിക അകലം പാലിക്കുന്നതുള്‍പ്പെടെയുള്ള കാര്യങ്ങള്‍ വിശദമായി ചര്‍ച്ച ചെയ്തായിരിക്കും കൊവിഡ് മാനദണ്ഡം പുറത്തിറക്കുക.

കൂടുതല്‍ വിദ്യാര്‍ഥികള്‍ പഠിക്കുന്ന സ്‌കൂളുകളില്‍ ഷിഫ്റ്റ് സമ്പ്രദായം നടപ്പിലാക്കിയാലും സാമൂഹിക അകലം പാലിക്കാന്‍ കഴിയുമോയെന്ന ആശങ്കയുണ്ട്. 

തദ്ദേശ തെരഞ്ഞെടുപ്പ് കൊവിഡ് വ്യാപനത്തിന് ആക്കം കൂട്ടിയെന്നാണ് ആരോഗ്യവകുപ്പിന്റെ വിലയിരുത്തല്‍. വരുംദിവസങ്ങളിലെ കൊവിഡ് വ്യാപനത്തിന്റെ തോതും കണക്കിലെടുത്തായിരിക്കും സ്‌കൂള്‍ തുറക്കല്‍ മാനദണ്ഡങ്ങള്‍ തയാറാക്കുക. 

മാത്രമല്ല കൊവിഡിനിടെ സ്‌കൂള്‍ തുറക്കുന്നതു സംബന്ധിച്ച് രക്ഷിതാക്കള്‍ക്കിടയിലും ആശങ്ക നിലനില്‍ക്കുന്നുണ്ട്. 

ഇതു പരിഹരിക്കണം. ഇത്തരം കാര്യങ്ങള്‍ വിശദമായി ചര്‍ച്ച ചെയ്തായിരിക്കും കുട്ടികള്‍ക്കായുള്ള കൊവിഡ് മാനദണ്ഡങ്ങള്‍ പുറത്തിറക്കുക.