കൊല്‍ക്കത്ത: സ്വന്തം കാണികള്‍ക്ക് മുന്നില്‍ രണ്ടാം മത്സരത്തിലും എ.ടി.കെക്ക് തോല്‍വി. 1-0 എന്ന സ്‌കോറിനാണ് നോര്‍ത്ത് ഈസ്റ്റ് യുനൈറ്റഡിനോട് കൊല്‍ക്കത്ത പരാജയപ്പെട്ടത്. ആദ്യ മത്സരത്തില്‍ ബ്ലാസ്റ്റേഴ്‌സിനോട് രണ്ട് ഗോളുകള്‍ക്ക് പരാജയപ്പെട്ടിരുന്നു. ആദ്യ സീസണിലായിരുന്നു കൊല്‍ക്കത്തക്ക് ഇതിന് മുമ്പ് ഇത്തരത്തിലുള്ള മോശം തുടക്കമുണ്ടായത്. 32-ാം മിനുട്ടില്‍ എ.ടി.കെ താരം സെനെ റാള്‍ട്ടെ ചുവപ്പ് കാര്‍ഡ് കണ്ട് പുറത്തായി. കൊല്‍ക്കത്ത പത്തുപേരായി ചുരുങ്ങിയിട്ടും നോര്‍ത്ത് ഈസ്റ്റിന് അവസരം മുതലാക്കാന്‍ 89-ാം മിനുട്ട് വരെ കാത്തു നില്‍ക്കേണ്ടി വന്നു. കോര്‍ണര്‍ കിക്കില്‍നിന്ന് ഹെഡറിലൂടെ റൗളിങ് ബോര്‍ജയാണ് നോര്‍ത്ത് ഈസ്റ്റിന്റെ വിജയ ഗോള്‍ നേടിയത്.
നോര്‍ത്ത് ഈസ്റ്റിന്റെ ആദ്യ മത്സരം ഗോവയുമായി സമനിലയില്‍ കലാശിക്കുകയായിരുന്നു. നിലവില്‍ പട്ടികയിലെ ഏറ്റവും അവസാന സ്ഥാനത്താണ് കൊല്‍ക്കത്ത ഇപ്പോള്‍.